Raportimi i bankave – Banka e Shqipërisë: Që nga viti i ardhshëm, vetëm me IFRS

Banka e Shqipërisë angazhohet që prej vitit të ardhshëm të heqë raportimin e dyfishtë financiar për bankat. Drejtori i Departamentit të Stabilitetit Financiar, Klodion Shehu, thotë në një intervistë për TV Scan se një nga kërkesat kryesore të bankave, pjesë e platformës për gjallërimin e kreditimit do të plotësohet së shpejti. Aktualisht, bankat janë të detyruara të raportojnë njëkohësisht me standardet ndërkombëtare të raportimit financiar, por edhe sipas standardeve të posaçme të kërkuara nga Banka e Shqipërisë për qëllime të mbikëqyrjes. Banka e Shqipërisë ka vendosur të heqë dorë nga kërkesa për një raportim të veçantë dhe do të njohë raportimin e bërë sipas standardeve ndërkombëtare, siç parashikon ligji për pasqyrat financiare dhe kontabilitetin.

Zoti Shehu thotë se Banka e Shqipërisë është e gatshme gjithashtu të marrë parasysh edhe kërkesat e tjera të sektorit bankar, që janë përfshirë në platformën për gjallërimin e kreditimit. Por, për momentin, bankat ende nuk kanë formuluar propozime konkrete. Çështjet për të cilat do të kërkohet përmirësimi i kuadrit rregullativ lidhen kryesisht me kolateralin financiar dhe pasuritë e paluajtshme që bankat kanë marrë në bilancet e tyre, si rezultat i procesit të ekzekutimit të kolateralit.

Megjithëse Banka e Shqipërisë ka shprehur angazhimin maksimal për të krijuar lehtësitë e nevojshme për një kreditimit më të mirë dhe më të shpejtë të ekonomisë, sërish një pjesë e madhe e çështjeve që parashikohen në platformë do të kërkojnë përfshirjen e angazhimin e institucioneve të tjera qeverisëse. Rrjedhimisht, edhe suksesi i platformës për gjallërimin e kreditimit do të varet në një masë të madhe nga vullneti politik për të mbështetur këtë qëllim.

Në platformën për gjallërimin e kreditimit, Banka e Shqipërisë dhe bankat tregtare kanë përfshirë 10 objektiva, mes të cilave shtimi i skemave të ndarjes së rrezikut të kredisë, marrja e aksesit në bazat e të dhënave të institucioneve shtetërore, rritja e bazës së kreditueshme të shqiptarëve, dike përmirësuar përfshirjen financiare, përmirësimi i edukimit financiar të popullsisë, dhe identifikimin, në bashkëpunim me qeverinë, të sektorëve strategjikë të zhvillimit të vendit.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.