Reagojnë ambasadorët e SHBA dhe BE – Yuri Kim: Drejtësia po ecen edhe pse nuk e duan “djemtë e këqinj”. Soreca: Mbështetje SPAK

Lajmi i përzgjedhjes së 28 anëtarëve të Byrosë Kombëtare të Hetimi është përshëndetur të premten nga dy përfaqësuesit e misioneve diplomatike në Tiranë, Shteteve të Bashkuara të Amerikës e Bashkimit Evropian. E para ka qenë ambasadorja Yuri Kim, e cila në rrjetet sociale ka dhënë mesazhin se drejtësia po shkon në drejtimin e duhur dhe se SPAK po sekuestron pasuri dhe po çon kriminelët pas hekurave.

“SPAK po procedon më shumë, duke sekuestruar pasuritë dhe duke i vendosur kriminelët pas hekurave; Gjykata Kushtetuese po funksionon; Gjykata e Lartë po shqyrton çështje; vetingu vazhdon. Inspektorët e BKH po trajnohen. Reforma në Drejtësi nuk është e lehtë, e shpejtë ose e përsosur, por po ecën përpara edhe nëse “djemtë e këqij” nuk e duan atë,” shkruan ambasadorja amerikane.

Pak minuta më pas ka ardhur dhe reagimi i Ambasadorit të Bashkimit Evropian Luigi Soreca. Edhe ambasadori i OSBE, Luigi Soreca, e ka përshëndetur certifikimin e 28 kandidatëve për Byronë Kombëtare të hetimit. Në mesazhin e tij, Soreca ka nënvizuar se është e rëndësishme të nisë një thirrje e dytë për hetues të BKH. “Ne mirëpresim përfundimin e procesit të verifikimit për kandidatët e parë për hetuesit të BKH. Urime grave dhe burrave që e përfunduan me sukses! Tani do të fillojnë trajnim të specializuar. E rëndësishme është të filloni një thirrje të dytë për hetues. BE vazhdon të mbështesë SPAK”, shkruan ambasadori Soreca.

Lorenc Rabeta / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.