Reagon ashpër Britania, Hunt: Jemi shumë të irrituar me BE për negociatat e Brexit

Sekretari i Jashtëm në Britani, Jeremy Hunt, kritikoi Bashkimin Europian për Brexit, duke thënë se Mbretëria e Bashkuar është irrituar nga qasja e bllokut në negociata.

Ndërkohë që vetëm 6 muaj kanë mbetur përpara se vendi të dalë nga Bashkimi Europian, bisedimet kanë ngecur pasi Brukseli hodhi poshtë në mënyrë turpëruese planin e Theresa May për tregtinë e lirë mes vendeve.

Hunt tha se ky refuzim nuk mjaftoi, duke përshpejtuar sulmin e qeverisë britanike ndaj qëndrimit të ashpër në Europë.

“Ata duhet të kuptojnë se ne jemi shumë të irrituar. Nëse Bashkimi Europian mendon se mund të refuzojë çdo ide konstruktive që ne ofrojmë, atëherë kjo nuk është një negociatë”, tha Hunt.

Ky i fundit, që zëvendësoi Boris Johsnon kur dha dorëheqjen 3 muaj më parë, krahasoi Europën me Bashkimin Sovjetik, duke tensionuar shumë politikanë në Bruksel.

“Ata duhet të jenë shumë të kujdesshëm me qasjen në negociata. Nëse ata mendojnë se i vetmi rezultat nga këto bisedime është ndëshkimi i Britanisë, atëherë nuk janë në pajtim me idealet europiane”, tha Hunt.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.