Reagon Banka e Kinës – Injekton para’ në sistem, ndërkohë që lufta tregtare merr vrull
Banka Qendrore e Kinës financoi institucionet financiare me 31 miliardë dollarë nëpërmjet facilitetit afatmesëm të huadhënies, duke vënë në dukje shqetësimet mbi likuiditetin dhe dëmin e mundshëm ekonomik nga lufta tregtare me Shtetet e Bashkuara. Injektimi surprizë i parasë erdhi përpara se presidenti i SHBA, Donald Trump, i dha vrull luftës tregtare duke kërcënuar vendosjen e tarifave në 10% për 200 miliardë dollarë mallra kinezë. Lëvizja vjen gjithashtu pas vendimit të papritur të Bankës Qendrore javën e kaluar, ku la kostot e huamarrjes për kreditë ndërbankare të pandryshuara, ndërkohë që Rezerva Federale në SHBA rriti normën bazë të interesit.
Analistët prisnin që institucioni të ndiqte sistemin bankar qendror në SHBA, për të mbajtur spread-in e yieldit në SHBA me atë kinez të qëndrueshëm. Investitorët e interpretuan si një pjesë të masave për t’u mbrojtur nga konflitet tregtare. Norma e interesit për kreditë 1-vjeçare ishte 3.3%, e pandryshuar nga injektimi i facilitetit afat-mesëm të huadhënies të bërë më parë. Banka Qendrore deklaroi se injektimi i parasë u ndërmor për të mbushur hendekun afat-mesëm deri në afat-gjatë të likuiditetit në sistemin bankar, në mënyrë që të përballen faktorë si pagesat e taksave, emetimet e titujve qeveritarë dhe marrëveshjet e anasjellta të riblerjes që maturojnë.
Sipas analistëve, banka qendrore po përballet me presione në likuiditet nga rritja e kostove të financimit të korporatave, pezullimit të emetimit të obligacioneve dhe dështimit të pagesave. Banka Qendrore deklaroi gjithashtu se ka injektuar 15 miliardë dollarë nëpërmjet marrëveshjeve të anasjellta të riblerjes.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.