Reduktimi i gjykatave, avokatët reagojnë ashpër: Bojkot gjyqeve për 4 ditë! Haxhia: Kush nuk zbaton urdhrin e Dhomës, heqje licence
Harta e re gjyqësore e sapo miratuar nga KLGJ, e cila parashikon reduktimin drastik të gjykatave në vend është pritur shumë ashpër nga dhoma e avokatëve. Përmes një njoftimi zyrtar, Dhoma Kombëtare e Avokatisë, njoftoi bojkotin e sallave të gjyqeve për katër ditë si protestë ndaj hartës së re gjyqësore.
Ndërkohë që edhe më i ashpër ishte reagimi i Kreut të Dhomës Kombëtare, Maks Haxhia, i cili paralajmëroi deri heqje të licencës për avokatët të cilës nuk i binden urdhrit.
Këshilli i Lartë Gjyqësor ka publikuar draftin për hartën e re gjyqësore, e cila parashikon reduktimin në vetëm 13 gjykata të shkallës së parë, 2 gjykatë administrative dhe 1 gjykata apeli për të gjithë vendin.
Me këtë draft, shkrihen gjykatat në Tropojë, Krujë, Lushnje, Pogradec, Mat, Përmet, Kurbin, Kavajë, e Pukë. Qëndrimit të avokatëve i është bashkuar edhe opozita, disa deputetë të së cilës kanë kërkuar seancë dëgjimore me përfaqësuesit e organeve të lartë të drejtësisë.
Lorenc Rabeta / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.