Reduktimi i stimujve të BQE – Në 2018, oferta e titujve pritet të kalojë blerjet e bankës për herë të parë

Qeveritë e Eurozonës mund të emetojnë më shumë tituj borxhi se sa blen Banka Qendrore Europiane në vitin që vjen,  suke shënuar herën e parë që kur nisën stimujt monetarë.

Blerjet e BQE pritet të përgjysmohen në 30 miliardë euro në muaj,  nga Janari deri në Shtator kur programi të përfundojë.

BQE do të përthithë përsëri ofertën e re të obligacioneve në Eurozonë, ndërsa stoku total që mban institucioni do të vazhdojë të limitojë rritjen e yield-eve.

Megjithatë analistët presin që të shohin sinjalet e para të zbutjes së influencës së bankës qendrore në një nga tregjet më të mëdha të borxhit në botë, ndërkohë që programi lehtësues hyn në vitin e katërt.

Për 3 vitet e fundit, pesha e blerjeve të BQE ka bërë që emetimi neto i obligacioneve, pas blerjes nga banka qendrore, të bie në rreth 400 miliardë euro.

Kjo ka krijuar një mungesë të titujve, duke çuar një pjesë të madhe të tregut në yield-e negative.

Sipas JP Morgan, vitin që vjen, blerjet e BQE ka gjasa të përputhen me emetimin neto.

Sipas bankës holandeze ABN AMRO, emetimi neto do të jetë pozitiv për të parën herë që prej nisjes së programit të lehtësimit sasior.

Banka vlerëson se oferta neto e obligacioneve do të jetë në 3 miliardë euro vitin që vjen, krahasuar me një rënie prej 300 miliardë euro këtë vit.

Ndër vendet anëtare, Franca dhe Italia projektohet se do të kenë ofertë më të madhe se blerjet e BQE në vitin që vjen.

Nga ana tjetër, oferta neto në Gjermani dhe Holandë, pritet të qëndrojnë në territor negativ.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.