Referimi online – Shiroka: Sistemi funksionon. Mjekët që nuk e zbatojnë mbajnë përgjegjësi
Sistemi i referimit online është efektivë dhe i detyrueshëm që nga data 8 janar në qendrat shëndetësore në Tiranë. Referimi online ka si qëllim që të shmangë burokracitë dhe ecejaket e pacientëve pas rekomandimit që merrnin nga mjeku i familjes drejt mjekut specialist. Sipas Ministres së Shëndetësisë referimi online po zbatohet në të 36 qendrat shëndetësore dhe në katër poliklinikat e specialiteteve në Tiranë.
Mjekja e familjes Bruna Shiroka shpjegon mënyrën si funksionon referimi elektronike dhe në të njëjtën kohë edhe benefitet që ka ky referim si për mjekët ashtu edhe për pacientët.
Në një vëzhgim të realizuar me kamerën e RTV SCAN në Qendrën e Specialiteteve nr 3, rezulton se ende ka pacientë që i drejtohen mjekut specialist me rekomandim të shkruar në letër. Me këto rekomandime pacientit nuk i është përcaktuar data dhe ora e vizitës tek mjeku specialist përkatës.
Sipas mjekes Bruna Shiroka nuk duhet të ketë më rekomandime në letër pasi ekziston një urdhër nga Ministria e Shëndetësisë që duhet të zbatohet. Ndërkohë që përgjegjësia për mos zbatimin e këtij urdhri bie mbi mjekët përkatës. Rekomandimet në letër do të përdoren deri në një fazë të dytë për pacientët që nuk janë të siguruar, të cilët duhet që të paguajnë faturën e vizitës.
Pas aplikimit të referimit online në Tiranë ky projekt do të shtrihet në të gjithë vendin. Sa i përket recetës elektronike që nisi si projekt pilot në qytetin e Durrësit, shtrirja e tij në të gjithë vendin është drejt fundit. Me recetën elektronike dhe referimin online do të krijohet edhe një regjistër të dhënash për çdo pacient.
Entela Barjamaj/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.