Reforma në Administratë Publike – Mesi në Ministerialin e Mirëqeverisjes: Kemi rimodeluar mënyrat e ofrimit të shërbimeve publike

Administrata Publike e depolitizuar që ka në bazë dhe në thelb meritokracinë, do jetë e ardhmja dhe suksesi për vendin tonë.

Kështu është shprehur zëvendëskryeministrja, Senida Mesi në Ministerialin e Mirëqeverisjes në Ballkanin Perëndimor të zhvilluar në Mostar të Bosnje-Hercegovinës. Të pranishëm në këtë konferencë ishin edhe përfaqësues të tjerë të lartë të Ballkanit Perëndimor, Komisioni Evropian (KE), OECD/SIGMA, organizata ndërkombëtare dhe partnerë të ndryshëm.

Sipas Mesit, reforma e ndërmarrë në Administratën Publike përbën një angazhim të fortë ndaj qytetarëve, komunitetit të biznesit si dhe partnerëve ndërkombëtar. Ndërkohë, duke u ndalur te zbatimi i planit të qeverisë në lidhje me reformën në shërbimet publike, deregulimin apo ristrukturimin e agjencive, Mesi shtoi se janë rimodeluar mënyrat e ofrimit të shërbimeve publike.

“Nëpërmjet proceseve integruese dhe të digjitalizimit, kemi rimodeluar mënyrat e ofrimit të shërbimeve publike. ADISA aktualisht ofron 535 shërbime të standardizuara dhe të integruara tek më tepër se 800 mijë qytetarë dhe planifikojmë ta zgjerojmë atë në ta gjithë vendin. Ndërsa nëpërmjet portalit qeveritar e-albania ofrohen aktualisht 551 shërbime elektronike dhe 774 shërbime informuese”, u shpreh zv.kryeministrja Mesi.

Ndërkohë, lidhur me Strategjinë për Reformën në Administratën Publike, Mesi bëri të ditur se është finalizuar “Plani i Veprimit 2018-2020”, një dokument i rishikuar i cili do të udhëheqë reformën gjatë dy viteve të ardhshme.

Ministeriali me në fokus përqasjen strategjike të Reformës në Administratën Publike u organizua nga Shkolla Rajonale e Administratës Publike (ReSPA), Kjo e fundit ka për qëllim rritjen e bashkëpunimit rajonal dhe mbështetjen ndaj zhvillimit të administratës publike në Ballkanin Perëndimor.

G.D/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.