Reforma në Drejtësi, vijojnë shpenzimet e “kripura” – Ministria parashikon tre opsione, më i mundshmi 34 milionë euro investime 5 vitet e ardhshme

Ndërsa Reforma në Drejtësi mbetet ndër më të kushtueshmet e viteve të fundit, kostot e saj do të vijojnë të mbeten mjaft të lartë edhe për të paktën 5 vjeçarin e ardhshëm. Është Ministria e Drejtësisë ajo që parashikon se vijimi i saj mund të kushtojë të paktën 54 milionë euro gjatë pesëvjeçarit të ardhshëm. Dikasteri ka hedhur për konsultim publik Draft Strategjinë Ndërsektoriale të Drejtësisë 2021-2025, ku parashikon 3 opsione për vijimin e saj. I pari, dhe me gjasat më të ulëta për t’u materializuar ruan status quo-në dhe në parim lë situatën të qëndrojë siç ishte në fund të vitit 2020, duke mos vijuar procesin e reformës në drejtësi, gjë që nuk do të sillte kosto shtesë për buxhetin e shtetit.

I dyti, i cili me shumë gjasa do të materializohet, ky opsion bazohet në një koncept të zbatimit të reformave në drejtësi në tre faza dhe përfshin gjithashtu investimet e nevojshme në IT në shumën afërsisht 13 milion, përmirësime në burime dhe personelin e Ndihmës Juridike në shumën 1.7 milion Euro, përmirësime në personelin për shërbimin e provës në shumën 2.9 milion Euro, krijimin e një qendre mjekësore për të dënuarit me sëmundje mendore për 13 milion Euro (me angazhime paraprake të Bankës për Zhvillim të Këshillit të Evropës, BB dhe BE) dhe në fund, 4 milion Euro për 2024 dhe 2025 për ndërtimin e një gjykate apeli në Tiranë. Ky skenar nuk parashikon rritje në staf gjatë periudhës së zbatimit të Strategjisë me përjashtim të shërbimit të provës dhe ndihmës juridike. Investimet në gjykata, në shërbimin e provës dhe në sistemin penitencial janë mbajtur në nivele të ulta. Kostot totale të reformës në opsionin 1 (investime kryesore) përllogariten në vlerën 34 milion Euro (4.2 miliard Lekë) ose 6 % të PBA gjatë 2021-2023 në pesë vitet e kohëzgjatjes së reformës.

Opsioni i tretë, ngjashëm me të mësipërmin, parashikon realizimin e të gjithë investimeve të synuara për maksimizimin e cilësisë së ofrimit të shërbimeve në vetëm 5 (pesë) vjet (2021-2025) dhe jo në 10 vjet sikurse parashikohet në Opsionin 1. Kostot e këtij opsioni llogariten të jenë të paktën 54 milion Euro për 5 vjet ose 10 % e shpenzimeve të PBA për periudhën përkatëse (10% të PBA).

Lorenc Rabeta / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.