Reforma në sistemin e burgjeve, Gjonaj: Largohen 130 policë, 65 të tjerë do të ndiqen penalisht

Mbi 130 punonjës të policisë së burgjeve rezultojnë me rekorde kriminale, ndërsa 70 të tjerë nuk kanë arsimimin e duhur të vendit të punës. Të parët do të largohen menjëherë nga puna, ndërsa për kategorinë e dytë, do të sistemohen në pozicione të përshtatshme ose do të largohen. Ky është rezultati në 6 muaj i reformës në sistemin e burgjeve. Nëpërmjet një statusi në facebook ministrja e Drejtësisë Etilda Gjonaj bën të ditur shifrat e raportit në gjashtë muaj, ndërsa shton se shumë shpejt do të nisë një sistem i ri rekrutim-trajnimi.

“Verifikimi i pastërtisë morale të punonjësve të sistemit të burgjeve, hapi i parë për pastrimin e plotë të radhëve të punonjësve të burgjeve nga elementët e inkriminuar. Shumë shpejt një sistemi i ri rekrutim-trajnimi në bashkëpunim me Akademinë e Sigurisë, për të siguruar një trupë shërbimi të pastër moralisht, të pandikuar politikisht dhe të aftë profesionalisht”.

Gjithashtu sipas raportit 65 punonjës janë proceduar penalisht për vepra të ndryshme penale, ndërsa 49 punonjës janë propozuar për masa administrative.

E.Z/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.