Regjistrimi i minoriteteve – Censi nuk do të jetë burimi i vetëm
Censi i Popullsisë nuk do të jetë më burimi kryesor zyrtar për regjistrimin e minoriteteve dhe grupeve etnike.
Instat zhvilloi të martën një takim Konsultativ mbi draft pyetësorin e Censit të Popullsisë dhe Banesave 2020”, me pyetje të dedikuara për Minoritetet dhe Grupet Etno-Kulturore. Drejtoresha e përgjithshme, Delina Ibrahimaj, theksoi se Shqipëria do të bëjë një regjistrim të veçantë, mbështetur në ligjin e ri për mbrojtjen e pakicave kombëtare.
Megjithatë, deri sa kjo të realizohet, do të tentohet kryerja e një numërimi sa më të besueshëm përmes censit. Pyetja për përkatësinë etnokulturore do të ketë disa alternativa, ku do të përfshihen grupet e njohura me ligj, ndërsa qytetarët do të kenë drejtë të mos i përgjigjen kësaj pyetjeje.
Censi i popullsisë dhe banesave i vitit 2020 do të zhvillohet me mjete elektronike. Plotësimi i pyetësorëve do të bëhet në terren me tableta, ndërsa në përfundim të anketimit përgjigjet do të dërgohen në kohë reale në bazën e të dhënave të Instat. Çdo qytetar do të ketë të drejtë të kërkojë akses në formularin e tij dhe, nëse do të ketë pasaktësi, anketimi do të bëhet nga e para.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.