Regjistrimi i pronave në plazhet e jugut, alarmi i OMONIA-s: Po na rrëmbehen pronat! Protestë me 14 janar në Himarë, ankimime në gjykata
Në fund të vitit të kaluar, qeveria shqiptare miratoi një vendim që përcakton regjistrimin dhe kalimin në përgjegjësi administrimi të ministrisë përgjegjëse për turizmin të pronave të paluajtshme shtetërore, në zonat kadastrale që i përkasin vijës bregdetare Vlorë– Sarandë, me qëllim përdorimin e tyre për zhvillimin e qëndrueshëm në turizëm.
Lista e pronave shtetërore që kalojnë në administrimin e ministrisë së Turizmit i përkasin plazheve të jugut. Në listë janë pronat në bregdetin e Dhërmiut, Jalës, Akuariumit të Jalës, Livadhit, Himarës, Potamit, Gjiri i Filikurit, Porto Palermo, Lukovë, Shën Vasil etj.
Vendimi përcakton se ministrisë përgjegjëse për turizmin i ndalohet të ndryshojë destinacionin e përdorimit të pronave të paluajtshme, t’i tjetërsojë ose t’ua japë ato në përdorim të tretëve, përveç projekteve të investimit në zonat me përparësi zhvillimin e turizmit.
Për më shumë lexo artikullin e plotë:
Por ky vendim ka shkaktuar jo pak reagime në radhët e organizatave që përfaqësojnë minoritarët në Shqipëri e madje ka pasur edhe një letër të posaçme për këtë çështje që i është dërguar nga Greqia Komisionit Europian. Në një deklaratë të shpërndarë me email për mediat nga organizata OMONIA, ky vendim konsiderohet si një “rrëmbim prone” ndaj edhe është njoftuar një protestë para Bashkisë së Himarës me datë 14 janar. Organizata paralajmëron se do t’i drejtohet Gjykatës Kushtetuese dhe se do të ketë edhe ankimime individuale. Çështja, paralajmërohet të shkojë deri në Gjykatën e Strasburgut.
Deklarata e plotë:
Në vazhdim të aksionit për shfuqizimin e KVM-së 708/2018 me anë të të cilit rrëmbehet prona e Himariotëve, OMONOIA e Himarës informon për veprimet qe do të ndërmerren në vazhdim në kuadër politik dhe ligjor.
Të hënën, me 14 janar në orën 10.00 paradite, ftojmë të gjithë Himariotët në grumbullimin e protestës qe do të organizohet jashtë zyrës së Hipotekës të Bashkisë Himarë.
Njëkohësisht, është në zhvillim aksion i koordinuar në kuadrin ligjor:
- Është krijuar shoqata e pronarëve të prekur në mënyrë qe, në bashkëpunim me organizatat dhe shoqatat ekzistuese, t΄i drejtohemi me ankim Gjykatës Kushtetuese të vendit kundër VKM-së.
- Ndërkohë, nisur nga fakti se e drejta e pronësisë është individuale, do të duhet qe çdo i prekur të ankimojë edhe individualisht. Për ankimin do të duhet pasja e çfarëdo prove shkresore nëpërmjet së cilës mund të provohet regjimi pronësor i pronës si edhe një diagrame topografike me koordinata gjeografike të pronës qe prekët.
OMONOIA e Himarës, është në kontakte të avancuara me zyra avokatie për t’u shërbyer pronarëve të prekur, të cilat kanë një aktivizim të suksesshëm në Shqipëri dhe kanë përvojë në lidhje me çështje qe janë atribute të Gjykatës së Strasburgut. Janë të ftuar banorët e Bashkisë së Himarës, pronat e të cilave përfshihen në VKM-në në fjalë, të procedojnë pa vonesë në ankimet individuale.
OMONOIA e Himarës do të ofrojë çdo ndihmë për pronarët e ligjshëm. Zyra e OMONOIAS në Himarë tashmë funksionon edhe si qendër informimi dhe ndihme, ndërsa në ditët në vazhdim programohet edhe prezencë e pandërprerë avokati asistent.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.