Rehabilitimi i varrezave të Sharrës – Veliaj: Nga investimi përfitojnë afro 6 mijë banorë të zonës
Investimi për rehabilitimin e varrezave të Sharrës do të shoqërohet edhe me një sistemim të plotë të infrastrukturës urbane, nga ku përfitojnë afro 6 mijë banorë të zonës. Kështu ka deklaruar kreu i Bashkisë së Tiranës, Erion Veliaj teksa ka inspektuar punimet në këtë zonë. Ai theksoi se një pjesë e rëndësishme e projektit prek edhe segmentin kryesor rrugor nga Kombinati deri në Sharrë, si dhe rrugëve të tjera lidhëse.
“Po punojmë për pjesën e varrezave, ndërkohë edhe dy akset kryesore, rruga nga Ndroqi-Tiranë, segmenti Vaqarr-Kombinat, është thuajse në përfundim, po ashtu edhe Rruga ‘Lek Zaharija’ që lidh një pjesë të madhe të zonave rurale, përreth Kombinatit për 6 mijë banorë. Për herë të parë në këtë zonë po investojmë si duhet, me kanalizime, ndriçim, trotuare etj”, u shprej Veliaj.
Kryebashkiaku tha se tashmë nuk ekziston më problemi i parcelave, pasi administrata e re e bashkisë ka mundur t’i japë zgjidhje problemeve procedurale. Veliaj teksa veçoi faktin që pjesë e këtij projekti janë edhe varrezat murale, faza e parë e të cilit ka përfunduar
“Sot kemi bërë progres edhe me një projekt, për të cilin është folur shumë, por nuk është bërë asgjë, siç janë varrezat murale. Unë besoj se qyteti duhet të ketë një harmoni kur respekton dinjitetin e atyre që nuk jetojnë më, por sigurisht edhe dinjitetin e të gjallëve që jetojnë dhe që kanë nevojë për shërbime publike. Ndaj ky është një projekt që i ka bashkuar të dyja këto nocione”, u shpreh Kryetari i Bashkisë së Tiranës.
Përveç rehabilitimit të rrugicave të brendshme të varrezave, investimi parashikon ndërtimin e 100 vendeve për parkim përgjatë rrugës si edhe disa segmente rrugore, si ai i rrugës kryesore Tiranë-Durrës, segmenti i rrugës Lekë Zaharia dhe ndërtimin e segmentit të rrugës dytësore të varrezave të Sharrës.
Nertila Doko/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.