Rekord i pacientëve në spital në SHBA – “Maja” pritet në 2 javët e ardhshme. Por, vetëm 10% janë në njësi intensive
Shtrimet në spitale me Covid-19 në Shtetet e Bashkuara, kanë arritur nivelin më të lartë në çdo pikë të pandemisë, ndërkohë që rritja e infeksioneve me variantin Omicron, po shton barrën tek sistemet e kujdesit shëndetësorë. Sipas përllogaritjeve të Reuters, 132,646 njerëz janë shtruar në spital me Covid, duke kaluar rekordin prej 132,051 të caktuar në Janar të vitit të kaluar. Megjithatë, kësaj radhë është ndryshe. Rahul Sharma, shefi i emergjencave tek një qendër mjekësore në New York (Presbyterian-Weill Cornell), tha se ndryshe nga rritjet e mëparshme, vetëm 50% të pacientëve në spital me Covid janë shtruar me simptomat klasike si vështirësi në frymëmarrje, pneumoni apo nivele të ulëta të oksigjenit.
Sharma tha se gjysma e të shtruarve me Covd-19 tek qendra, janë të vaksinuar dhe ndërsa spitali i tij është në mbikapacitet, më e keqja nuk ka kaluar ende. Sipas tij, maja e shtrimeve në spitale pritët në 2 javët e ardhshme. Në të gjithë vendin, pacientët në spital janë rritur në mënyrë të qëndrueshme që prej fundit të Dhjetorit, duke u dyfishuar në 3 javët e fundit, ndërkohë që Omicron i zuri vendin Delta, si varianti mbizotërues i koronavirusit. Megjithatë, ka lajme të mira, pasi Omicron duket më pak i ashpër se variantet e mërpashme, sipas Sharma. “Rreth 10% e këtyre pacientëve janë në njësi intensive dhe 5% me ventilatorë, që është shumë më ulët se në valët e mëparshme”- tha ai.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.