Rekord i ri të infektuarish me COVID-19 në Shqipëri. Kruja zona më aktive, shumica e të prekurve nga aktivitete biznesi
Shqipëria po vazhdon të shënojë rekorde negative sa i përket rasteve të reja ditore të infektuarve me COVID-19. 57 persona në ditën e sotme kanë rezultuar pozitivë nga 362 testimet e bëra në 24 orët e fundit.
Një nga vatrat rezulton reparti i hematologjise të QSUT kur numri të infektuarve ka shkuar ne 11: sot ishte rasti me i fundit.
Kruja ka numrin më të lartë të rasteve ditore, me 16 të prekur që lidhen me aktivitete biznesi dhe kontakte të tyre, e ndjekur nga Tirana me 14 raste, 9 në Vlorë, 8 në Shkodër, 6 në Lushnje, 2 në Pukë, 1 në Durrës, 1 në Fier. Ndërkohë që janë në hetim shumë raste të reja në Tiranë, Vlorë, Shkodër dhe Krujë.
Gjatë 24 orëve të fundit janë shëruar 5 qytetarë duke e çuar numrin e të shëruarve që nga fillimi i epidemisë në 1044. Aktualisht në spitalin infektiv po marrin shërbim 47 pacientë, 5 më pak se dje, pra të shëruarit janë larguar dhe nuk kemi shtrime të reja në 24 orët e fundit. 7 prej pacientëve të shtruar janë në terapi intensive dhe një i intubuar. Në vendin tonë janë aktualisht 441 persona aktivë me COVID19, kryesisht në Tiranë, Shkodër, Krujë.
Ministria e Shëndetësisë dhe Mbrojtjes Sociale apelon bizneset dhe qytetarët të respektojnë rregullat. Ministria rekomandon bizneset, institucionet dhe kompanitë, që kudo ku është e mundur të punohet nga shtëpia për të frenuar përhapjen e Covid19. Gjithashtu, Shëndetësia kujtohet sot të theksojë që thyerja e karantinës është e dënueshme pasi rrezikon shëndetin e qytetarëve dhe se çdo rast i identifikuar, qoftë edhe pa shenja, duhet të izolohet.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.