Rekord shqiptarësh në Mal të Zi – Rritje me 15.6% gjatë Dhjetorit, grupimi më i madh i turistëve në vend
Të dhënat e agjencisë së statistikave të Malit të Zi (Monstat) tregojnë se gjatë Dhjetorit të vitit që sapo lamë pas, numri i turistëve shqiptarë është rritur ndjeshëm, me rreth 15.6%, në 5142 individë. Koha mesatare e qëndrimit e shprehur në netë fiksohet në 1.69, thonë të dhënat zyrtare. Shifrat tregojnë se shqiptarët janë grupimi më i madh i turistëve të huaj në vend gjatë Dhjetorit, e po ashtu edhe grupimi që raporton rritjen më të madhe mes të gjitha kombësive të tjera.
Shqiptarët përbëjnë kështu 13% të totalit të vizitorëve të huaj në mal të Zi gjatë dhjetorit. Muaji i fundit i viti, por edhe muaji i parë janë më të frekuentuarit nga shqiptarët në Mal të Zi. Të dhëna të tjera nga zyra helene e statistikave ndërkohë (INSETE) tregojnë se, numri i vizitorëve shqiptarë është rritur me 10% gjatë Janarit të këtij viti.
Por në këtë rast është e pamundur të klasifikosh motivet e udhëtimit, duke qenë se Greqia ka një numër të konsiderueshëm emigrantësh nga Shqipëria. Të dyja këto të dhëna, si për Malin e Zi, si për Greqinë, flasin për një tendencë në rritje të shqiptarëve për turizmin ditor, kryesisht drejt fqinjëve gjeografik.
Roel Korkuti / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.