Reshje bore dhe rreshqitje dheu/ Autoriteti Rrugor informon drejtuesit e automjeteve: Ku duhet të tregoni kujdes
Gjatë natës ka patur reshje bore dhe reshje me intensitet të lartë shiu në veri dhe jug të vendit. Autoriteti Rrugor Shqiptar njofton se reshje bore ka pasur në Qafë Mali-Fierzë, Bajram Curri-Valbonë, Pukë-Fushë-Arrës-Shemri, Fushë Arrës-Qafë Mali, pjesët fundore të akseve U. Cerenecit- Steblevë, dhe Kuben-Vasije.
Sipas ARRSH-së, qarkullimi vazhdon normalisht, pa zinxhirë, në të gjithë rajonin e veriut. Në segmentin Fushë Studë-Steblevë ka rreth 5-7cm dëborë, por nuk ka probleme me qarkullimin.
ARRSH njofton se për shkak të reshjeve të dendura të shiut ka pasur rënie gurësh dhe rënie dherash në akset rrugore:
Në aksin Berat-Çorovodë, që ka sjellë vështirësi në qarkullim për disa minuta, aktualisht rruga është pastruar dhe qarkullimi kryhet pa probleme.
Drejtuesit e mjeteve duhet të tregohen të kujdesshëm pasi mund të ketë përsëri rënie gurësh për shkak të reshjeve.
Në km 12 të aksit Maliq-Lozhanë pati rënie të një masivi dherash dhe pemesh, të cilën kontraktorët e mirëmbajtjes e pastruan dhe tani qarkullimi vazhdon normalisht.
Në aksin Çorovodë-Hambull pati rënie guresh, u pastruan nga kontraktori e qarkullimi vazhdon normalisht.
Në aksin Këlcyrë-Përmet pati dalje të disa përenjve anësorë duke sjellë në rrugë dhera dhe gurë, aksi u pastrua nga kontraktori, qarkullimi vazhdon normalisht.
Drejtuesit e mjeteve duhet të tregohen të kujdesshëm për shkak të lagështisë në rrugë, të reduktojnë shpejtësinë dhe të respektojnë sinjalistikën rrugore.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.