Reshjet e shiut, akset rrugore ku ka pasur vështirësi në qarkullim – Policia, drejtuesve të mjeteve: Bëni kujdes në udhëtim

Edhe Policia Rrugore ka reaguar përmes një njoftimi, duke kërkuar nga të gjithë drejtuesit e mjeteve që të bëjnë kujdes gjatë qarkullimit në akset rrugore, për shkak të lagështisë në rrugë. Po sipas policisë, për shkak të motit të keq, vështirësitë në qarkullim kanë sjellë edhe një trafik të rënduar në disa akse.

“Si rezultat i reshjeve, është vështirësuar qarkullimi në aksin rrugor Orikum – Dukat, për shkak të rënies së dherave në rrugë. Po punohet për pastrimin e rrugës. Për të ndihmuar lëvizjen në këtë aks, janë angazhuar dy patrulla të Policisë Rrugore”.

Sa më sipër, Policia Rrugore këshillon drejtuesit e mjeteve të tregojnë kujdes maksimal gjatë udhëtimit:

– Të ruajnë kontrollin e mjetit dhe të kryejnë manovra të sigurta

– Të qarkullojnë me shpejtësi konform segmentit rrugor dhe sinjalizimit përkatës

– Të përdorin rripat e sigurimit në mjete, kaskat mbrojtëse në motoçikleta

– Të mos përdorin aparatet celulare gjatë drejtimit të mjeteve

– Të mos përdorin pije alkoolike në rast drejtimi të mjeteve

– Të bëjnë kujdes me këmbësoret që kryejnë kapërcimin e rrugës jashtë rregullave të qarkullimit rrugor.

“Karvanët me makina të dasmorëve të respektojnë rregullat e lëvizjes, të mos parakalojnë, dasmorët të mos dalin nga dritaret pasi bëhen burim aksidenti. Për shkelësit e normave të sjelljes gjatë drejtimit të automjetit, Policia Rrugore do të marrë masat administrative maksimale ndaj tyre. Policia Rrugore është në detyrë me patrulla dhe shërbime të përforcuara për të ndihmuar në kthimin e sigurt të drejtuesve të mjeteve, për të normalizuar trafikun, për t’ju ardhur në ndihmë në rast nevoje, për të parandaluar aksidentet, me qëllim rritjen e parametrave të sigurisë rrugore”, thuhet në njoftimin e Policisë Rrugore.

os.de/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.