Reshjet masive në ditët në vijim, mblidhet Shtabi i Emergjencave në Vlorë – Thirrje për evakuim për qytetarët që rrezikohen nga përmbytjet
Moti ekstrem që pritet të godasë vendin duke nisur nga dita e nesërme ka detyruar mbledhjen e Shtabit të Emergjencave Civile në Prefekturën e Qarkut të Vlorës.
Ka qenë prefekti Flamur Mamaj, i cili ka drejtuar mbledhjen, ku merret pjesë edhe kryetari i Bashkisë së Vlorës, Dritan Leli. Mamaj ka bërë ndarjen e detyrave për çdo institucion, ndërsa ka kërkuar mbështetje edhe nga ushtria për përballimin e situatës.
“Duke u bazuar nga parashikimet e motit zhvillojmë këtë takim, për shkak se priten reshje shiu më 30 nëntor, 1 dhe 2 dhjetor. Këto reshje do të jenë të shtuara.
Disa firma do të përballojnë disa problematika nëse do të hasen. Të gjitha strukturat duhet që të japin në kohë reale sinjalin që popullata të mos jetë në kushtet e befasisë. Ushtria dhe të gjitha institucionet duhet të angazhohen për përballimin e kësaj situate.
Janë evidentuar disa pika të dobëta të argjinaturave dhe kanaleve. Të gjitha stacionet e pompimit janë në punë dhe të furnizuara me dy linja të energjisë elektrike. Po ashtu Ndërmarrja e Ujësjellës Kanalizimeve i ka marrë të gjitha masat”, tha Mamaj.
Prefekti u ka bërë thirrje qytetarëve që mund të preken nga përmbytjet të evakuohen në kohë reale. Në jugun e vendit, pritet që mbi 500 mm shi për metër katror të bien deri më 3 Dhjetor, çka rrit rrezikun për përmbytje dhe rrrëshqitje masive dherash.
A.H./SCAN
Reshje ekstreme këtë javë në Shqipëri, rrezik përmbytjesh dhe rrëshqitje dherash – Në veri dhe lindje pritet borë
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.