Revoltohen fermerët në Holandë – Tranzicioni i gjelbër që synon vendi ka një kosto të madhe për ta!

Fermerët në Vendet e Ulëta janë të zemëruar për shkak të masave të ashpra që janë ndërmarrë me synimin për të reduktuar në mënyrë drastike emetimet e oksideve të azotit. Qeveria holandeze prezantoi objektivat e saj, të cilat parashikojnë një reduktim nga 70% në 95%, në varësi të zonave. Një tranzicion i pashmangshëm sipas qeverisë, e cila tashmë duhet të përballet me protestat po aq të pashmangshme të fermerëve që preken në mënyrë të drejtpërdrejtë nga kjo situatë.

Ministrja holandeze e Agrokulturës u shpreh se vendi duhet të emetojë shumë më pak azot dhe për fat të keq sektori i agrokulturës emeton shumë. Sipas saj fermerët kanë bërë shumë përpjekje për të reduktuar emetimet por nuk është e mjaftueshme.

Rregullat e reja pritet të trondisin shumë industrinë agrokulturorë multi miliardere të vendit, i cili me 17 milion banorët e tij, numëron katër milion bagëti, 12 milion derra dhe 10 milion pula

Vendet e ulëta janë vendi i dytë eksportues në botë për sa i përket prodhimeve të agrokulturës, pas Shteteve të Bashkuara të Amerikës. Por tashmë cdo fermer holandez do të jetë i detyruar të reduktojë numrin e bagëtive.

Për momentin opsionet e vëna në dispozicionin e tyre janë plane të qëndrueshmërisë, transferimit ose mbylljes së aktivitetit. Në tryezën e bisedimeve mes palëve ka më shumë se 24 miliard subvencione, por nuk është e qartë nëse do arrihet të zbutet kriza e një sektori që faturon dhjetëra miliard cdo vit.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.