Revolucioni i edukimit financiar në shkolla – JAA: Sipërmarrësit e rinj shqiptarë, mbi 8 kompani nga nxënësit janë aktualisht në treg
Prej disa vjetësh në Shqipëri, nxënësit e sistemit arsimor parauniversitar kanë mundësi të marrin edukim financiar konkret dhe praktik nëpërmjet programit amerikan 100 vjeçar. Përgjatë gjithë vitit të fundit akademik 3,511 nxënës përfituan njohuri për sipërmarrjen dhe 150 prej tyre avancuan më tej duke zhvilluar fillimisht idetë e tyre të biznesit e më pas u përfshinë në trajnime për të thelluar e praktikuar dijet e marra dhe zhvilluar sipërmarrjet e tyre.
Në këtë kontekst u zhvillua dhe Panairi Kombëtar i Kompanive të Nxënësve nën kujdesin e Junior Achievment Albania, një program i Fondit Shqiptaro-Amerikan për Zhvillim, AADF. 14 Kompani të ngritura nga 72 nxënës të 12 shkollave të mesme, publike dhe jopublike në Shqipëri, u përfshinë në këtë panair.
Një Juri e përbërë nga 5 pjesëtarë të komunitetit të biznesit, intervistoi dhe vlerësoi kompanitë konkurruese bazuar në kriteret e: inovacionit dhe sipërmarrjes, produktit dhe fokusi tek klienti, performancës financiare, planifikimit dhe administrimit të kompanisë, si dhe aftësisë për të demonstruar arritjet në të mësuar.
“Kjo risi në sistemin tonë të edukimit duhet të mbështetet dhe promovohet pasi po formon klasën e re të sipërmarrësve shqiptarë të cilët do të jenë shumë më të ditur për tu përballur me “dallgët” e tregjeve”, u shpreh Blerina Guga, shefe ekzekutive e JAA.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.