Rezervat e drithërave gjatë pandemisë – Rusia do pezullojë eksportet për 6 Javë, nëse shterojnë kuotat në Maj
Rusia, që është eksportuesi më i madh në botë i grurit, do të pezullojë eksportet e drithërave deri më 1 Korrik, pasi kuotat e eksportit të shterojnë, që pritet aktualisht të ndodhë në mes të muajit Maj, sipas zv/Ministres së bujqësisë, Oksana Lut. Rusia ndaloi tërësisht eksportet e drithërave në vitin 2010 për herë të fundit, kur thatësira goditi të korrat, gjë që tronditi tregjet botërorë. Turqia, Egjipit dhe Bangladeshi janë blerësit më të madh të grurit rus.
“Kuota është prezantuar për periudhën nga 1 Prilli në 30 Qershor 2020. Pasi të shterojë , dërgesat jashtë Bashkimit Ekonomik Euroaziatik do të ndalojnë për këtë periudhë”, tha zv/ministrja. Sipas saj, me ritmin aktual, eksportet pritet të pezullohen në mes të muajit Maj. Ajo shtoi se nuk ka plane të rritjes së kuotave për tremujorin e dytë dhe ministria e Bujqësisë mund të ruajë mekanizmin e kuotave të eksportit të grurit në sezonin e ri tregtar 2020-2021, që nis më 1 Korrik. Për të ruajtur furnizimet për tregun e brendshëm gjatë pandemisë së koronavirusit, Rusia, së bashku me vende të tjera fqinje, që janë eksportues gjigantë të drithërave përmes Detit të Zi, limituan eksportet e drithërave më herët gjatë muajit Prill.
Egjipti, blerësi më i madh i drithërave në botë, porositi 180,000 ton nga Rusia në tenderat këtë javë, në përpjekje për të shtuar rezervat strategjike për shkak të koronavirusit. Oksana tha se nëse eksportet e Rusisë pezullohen, nuk do të ketë përjashtime për kompani të veçanta. Rusia e ka caktuar kuotën për eksportet e drithërave në 7 milionë ton për periudhën Prill- Qershor. Edhe pse sasia është një linjë me shumën që vendi priste të dërgonte gjatë periudhës, vlerësohet se deri të Premten e kaluar, 4.2 milionë ton të drithërave kishin mbetur të disponueshëm për eksport nga kuota.
Klevi Llaha / SCAN
Çfarë importuam në masë në 5 ditët e fundit? Lista e Doganave/ Kryeson gruri dhe agrumet
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.