Rezervat minimale të naftës – Komuniteti i Energjisë, kritika qeverisë shqiptare: Keni 3 vjet që nuk miratoni ligjin
Për të tretin vit radhazi, Shqipëria dështoi të miratojë projektligjin për krijimin, mirëmbajtjen dhe administrimin e rezervave minimale të sigurisë së naftës bruto dhe produkteve të naftës”. Konstatimi vjen në raportin vjetor të implementimit të reformave, të publikuar në muajin nëntor nga Komuniteti i Energjisë. Sipas dokumentit, projektligji vazhdoi të diskutohej nga palët e interesuara, por asnjë progres nuk u arrit gjatë periudhës së raportimit.
Ndërsa sjell në vëmendje se sistemi aktual i mbajtjes së stokut të naftës nuk është në përputhje me Direktivën 2009/119 të Bashkimit Evropian. Sipas projektligjit të prezantuar nga qeveria, rezervat e sigurisë krijohen dhe mbahen për të siguruar furnizim të pandërprerë të tregut me produkte energjetike hidrokarbure. Ndërkohë që, shuma e përgjithshme e rezervave të sigurisë në vendin tonë duhet të jetë të paktën 90 ditë mesatare ditore të importeve neto ose të paktën 61 ditë të mesatares ditore të sasisë të konsumit të brendshëm.
Ndërkaq, sekretariati i Komunitetit të Energjisë sjell në vëmendje se dispozitat kryesore të Direktivës 98/70 u transpozuan në legjislacionin shqiptar përmes Vendimit të Qeverisë për cilësinë e karburantit, benzinës dhe naftës. Megjithatë, legjislacioni duhet të ndryshohet për të siguruar që përmbajtja e squfurit në vajin e gazit për makineritë e lëvizshme jo-rrugore është më pak se 10 mg / kg. Sipas raportit, pavarësisht shumë përpjekjeve të qeverisë, disa sfida duhet të trajtohen ende, duke përfshirë ndotjen që mund të ndodhë gjatë shpërndarjes, e cila është e vështirë të identifikohet nëse nuk ekzistojnë sisteme rigoroze të monitorimit dhe analizës.
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.