Rezervat në SHBA mbështesin naftën – Brenti i Londrës, fitime për të katërtën javë me radhë

Nafta po shfaqet e qëndrueshme edhe gjatë sesionit të sotëm, me dy bençmarkët kryesorë që pritet të publikojnë fitimet më të mëdha disa javore. Çmimet janë mbështetur nga rënia e rezervave të naftës në SHBA dhe nga largimi i tensioneve tregtare, pasi Pekini dhe Uashingtoni ranë dakord të zhvillojnë bisedime të nivelit të lartë muajin e ardhshëm. Nafta Brent e Londrës po tregtohet në rreth 60.9 dollarë për fuçi, ndërsa nafta Bruto amerikane po tregtohet në rreth 56.2 dollarë për fuçi.

Brenti i Londrës pritet të publikojë fitime për të katërtën javë me radhë. Pekini dhe Uashingtoni ranë dakord të zhvillojë bisedime tregtare në fillim të tetorit, ndërsa investitorët shpresojë se dy ekonomitë më të mëdha në botë do të jenë të detyruara të arrijnë një marrëveshje, pasi lufta e tarifave ka dëmtuar, jo vetëm Kinën dhe Shtetet e Bashkuara por të gjithë ekonominë globale. Lufta e tejzgjatur ka dëmtuar edhe kërkesën për naftë, që rrjedhimisht ka ushtuar presion edhe mbi çmimet.

Referuar të dhënave zyrtare të publikuara në SHBA nga Administrata për Informimin mbi Energjinë, rezervat e naftës ranë për të tretën javë me radhë, pavarësisht rritjes së importeve. Rezervat ranë me 4.8 milionë fuçi, rreth dy herë më shumë se parashikimet e analistëve, në totalin e 423 milionë fuçive, niveli më i ulët që nga tetori i vitit 2018. Pas publikimit të këtij raporti të enjten në mbrëmje, çmimet e naftës u rritën me rreth 2%. Ndërkohë, një shenjë tjetër e ngadalësimit të ekonomisë globale ishte rënia surprizë e prodhimit industrial në Gjermani, gjatë korrikut. Ky raport ka shtuar mundësitë që ekonomia më e madhe e Europës të bjerë në recesion në tremujorin e tretë të këtij viti.

Lidion Kulla / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.