Rezultatet e bankave – Tremujori i parë rezulton pozitiv, 11 prej tyre janë me fitim

Bankat tregtare kanë shfaqur aktivitet fitimprurës në tremujorin e parë të këtij viti. Sipas të dhënave të paaudituara nga Shoqata Shqiptare e Bankave, nga 16 banka të sistemit, 11 prej tyre raportuan një rezultat fitimprurës për tremujorin e parë.

Përfitueshmëria ngelet më e lartë te bankat më të mëdha të sistemit, megjithatë në këtë fillim viti ka një kthesë pozitive edhe te disa prej bankave që kishin regjistruar rezultate negative në vitet e fundit. Bankat më të mëdha, që zotërojnë më shumë se 10% pjesë tregu, e mbyllën të gjitha me fitim tremujorin e parë. Në këtë grup përfshihen Banka Kombëtare Tregtare, Raiffeisen, Credins dhe Intesa Sanpaolo.

BKT dhe Raiffeisen janë të vetmet me fitime në vlera 10—shifrore, përkatësisht me 1.75 dhe 1.37 miliardë lekë fitime për tremujorin e parë. Këto banka kanë kthime ndjeshëm më të larta se pjesa tjetër e sistemit, falë pjesës së lartë të tregut dhe sidomos bazës së gjerë të ardhurave nga investimet me rrezik të ulët, sidomos nga bonot dhe obligacionet qeveritare. Sipas Shoqatës së Bankave, BKT regjistroi një kthim tremujor nga kapitali në masën 40%, ndërsa Raiffeisen 31.5%.

Për pjesën tjetër të sistemit bankar, fitimet janë në përmasa më të kufizuara, qoftë në vlerë absolute, qoftë të matura si kthim nga kapitali i investuar. Credins Bank e mbylli tremujorin e parë me një fitim prej 108 milionë lekësh, duke konfirmuar edhe këtë tremujor performancën pozitive të qëndrueshme prej vitesh. Mes bankave të përmasave të mesme, me pjesë tregu deri në 7%, Tirana Bank ju rikthye rezultateve pozitive pas një serie prej disa vitesh radhazi me humbje.

Rezultate pozitive regjistruan edhe Union Bank, NBG Bank dhe ABI Bank. Që prej vitet të kaluar, këto banka po regjistrojnë një performancë vjetore pozitive. Ndërkohë, Alpha Bank mbylli një tjetër tremujor me humbje, së bashku me Societe Generale. Banka e grupit francez ka pësuar një frenim të përkohshëm, pasi në vitet e fundit ka regjistruar rezultate fitimprurëse, të shoqëruara me rritje të vazhdueshme të pjesës së saj të tregut.

Ndër bankat më të vogla, me pjesë tregu nën 2%, Veneto Banka, pasi mbylli me humbje të thellë vitin 2016, e ka nisur me rezultat fitimprurës vitin 2017. Rezultat pozitiv raportuan Fibank dhe Banka e Bashkuar e Shqipërisë, ndërsa me humbje rezultuan Banka Ndërkombëtare Tregtare dhe Banka e Kreditit të Shqipërisë.

Ersuin Shehu/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.