Rezultatet e “Credins”/ Rritje dyshifrore edhe në tremujorin e dytë të vitit

Credins Bank ka publikuar treguesit financiarë të tremujorit të dytë të këtij viti, që treguan një vijimësi të rritjes me ritme të kënaqshme. Në fund të qershorit, totali i aktiveve arriti vlerën e afro 206 miliardë lekëve ose rreth 1.7 miliardë eurove.

Vlera e aseteve është rritur me 11% krahasuar me të njëjtën periudhë të një viti më parë. Aktualisht, Credins është banka e tretë më e madhe në Shqipëri, me rreth 14% të aseteve totale të tregut.

Kredia për sektorin privat vazhdon të jetë zëri me peshën kryesore në strukturën e aktiveve. Në mesin e këtij viti, Credins kishte një portofol kredie neto në vlerën e rreth 100 miliardë lekëve, 3.2% më shumë krahasuar me të njëjtën periudhë të një viti më parë.

Në dy vitet e fundit, rritja e portofolit të huasë ka qenë më e kujdesshme dhe banka e ka diversifikuar strukturën e aktiveve, duke rritur vlerën e instrumenteve me rrezik të ulët, kryesisht bono dhe obligacione qeveritare. Sidoqoftë,Credins ngelet banka e dytë më e madhe kredituese e ekonomisë shqiptare, me afro 18% të portofolit total të kredisë.

Në krahun e detyrimeve, Credins është një ndër aktorët me rezultatet më të mira në tërheqjen e depozitave të publikut. Vlera totale e tyre në fund të qershorit ishte 177 miliardë lekë ose 1.45 miliardë euro. Depozitat u rritën me 15.2% krahasuar me një vit më parë.

Ersuin Shehu/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.