Rezultati i BNP Paribas – Fitimi rritet prej shitjes së aktiveve, të ardhurat nga tregtimi në rënie

Banka më e madhe franceze, BNP Paribas, raportoi një rritje e 8% në fitimin neto të tremujorit të tretë, ndërkohë që shitjet e aktiveve dhe reduktimet e kostove kanë kompensuar për njësitë e lidhura me tregtimin.

Megjithatë, edhe banka franceze nuk u përjashtua nga rëniet e të ardhurave nga tregtimi i titujve të borxhit, që ka goditur edhe rivalët e vet prej aktivitetit të dobët të klientit dhe luhatjeve të vogla në tregje.

“BNP Pariba raportoi gjatë tremujorit të tretë zhvillime pozitive të biznesit në një mjedis ekonomik të përmirësuar në Europë. Megjithatë, aktivitetet e lidhura me tregjet kanë patur ndikim negativ”, deklaroi banka.

Të ardhurat në total ranë me 1.8% në 10.39 miliardë euro për tremujorin, poshtë vlerësimeve prej 10.6 miliardë nga analistët, ndikuar nga lëvizjet negative në këmbimin valutor.  Uljet e kostove dhe shitja e pronësisë në kompaninë indiane të sigurimeve SBI Life, sollën një rritje me 8% të fitimit tremujor, në 2.04 miliardë euro, shifër sipër vlerësimeve të analistëve.

Megjithatë, performanca negative në tregje ka marrë vëmendjen e investitorëve, duke sjellë edhe rënien e aksioneve të bankës me rreth 3% në hapje të sesionit tregtar.  Të ardhurat nga tregtimi i borxhit, valutave dhe lëndëve të para ranë me 26%, poshtë mesatares prej 22% të rivalëve në SHBA, megjithatë sipër homologëve në Europë si UBS, Deutsche Bank dhe Barclays.

Rëniet e mëdha në tregtimin e obligacioneve kanë goditur bankat e investimeve,  kryesisht prej ngadalësimit të aktivitetit të klientit dhe luhatshmërisë së vogël në tregje.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.