Riatdhesohen 218 azilkërkues nga BE – Hajnaj: Kërkesat për azil janë pa shpresë

Vijon rikthimi i shtetasve, të cilët kanë tentuar të kërkonin azil në Evropë. Sipas Policisë së Shtetit, rreth 218 shtetas janë kthyer në aeroportin “Nënë Tereza” prej të cilëve, 88 të deportuar nga Gjermania me avion të posaçëm, pasi kishin abuzuar me kërkesa për azil dhe 218 shtetas të tjerë të rikthyer mbrëmjen e së mërkurës  nga vendet e BE-së, të cilët po ashtu tentuan të përfitonin azil.

Ndërsa nga Franca janë kthyer me vullnetin e tyre, 130 shtetas shqiptarë. Drejtoresha e Departamentit të Kufirit dhe Migracionit, Aida Hajnaj në një prononcim për mediat u shpreh se:

“Në fillim të muajit Nëntor autoritetet shqiptare me përfaqësues nga Ministria e Brendshme dhe Policia e Shtetit kanë zhvilluar disa takime me autoritetet e Lionit dhe zyrën rajonale të imigracionit dhe integrimit, ky u diskutuan  për problemet dhe zgjidhjen e azilkërkimit, ku u theksua forcimi i shkëmbimit të informacionit në këtë drejtim. Policia e Shtetit po mbledh informacionin e duhur dhe ka filluar investigimin për të hetuar çdo organizatë apo shtetas që përgatit dokumente false ose shtyn shtetasit shqiptarë për të marrë rrugën e azilit. Janë evidentuar disa raste. Policia  e shtetit i ka marrë të gjitha masat. Shtetasit shqiptarë duhet zbatojnë rregullat e lëvizjes së lirë dhe ndërgjegjësohen se kërkesat për azil janë pa shpresë”, u shpreh Hajnaj.

Nertila Doko/SCAN 

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.