Rifillon transporti publik? – Mema: Do zbatojmë protokollet. Memaj: S’dalim në punë
Komiteti Teknik i Ekspertëve ka vendosur rinisjen e funksionimit të transportit publik. Fillimisht, u vendos që ky aktivitet të niste në datën 15 qershor, por për shkak se u konsiderohet me risk në lart për përhapjen e koronavirusit të ri u vendos shtyrja e tij. Vendimi u komunikua nga ministrja Ogerta Mansatirliu, e cila tha se përdorimi I maskës do të jetë detyrim.
Komiteti Teknik i Ekspetëve vendosi heqjen e kufizimit për transportin publik, pra do të vijoj transporti publik ndërqyetetas dhe brenda qytetit, por me disa masa dhe protokolle të veçanta të cilat tashmë janë të miratuara dhe aprovuara nga Ministria e Shëndetësisë dhe Mbrojtjes Sociale. Dua të theksoj se përdorimi i maskës gjatë udhëtimit si për ata që shërbejnë dhe për qytetarët që përdorin transportin publik do të jetë i detyrueshëm. Nuk do të ketë asnjë tolerancë nëse do të konstatohet mosrespektim i këtyre masave dhe rregullave të vendosura që janë të domosdoshme për të mbrojtur shëndetin e popullatës dhe për të mos lejuar përhapjen e SARS-COV2.
Megjithatë, pas këtij komunikimi kanë reaguar operatorët e transportit publik që duket se janë ndarë në vendimin e tyre për të rinisur aktivitetin. I kontaktuar nga TV SCAN kreu i Shoqatës së Transportit Kombëtar Interurban, Kujtim Mema deklaroi se nga e e mërkura do të rinisë puna, duke zbatuar protokollet e sigurisë, që parashikojnë funksionimin me 70% të kapacitetit. Por, ndryshe nga kjo shoqatë Unioni i Operatorëve të Transportit, që përfaqësohet nga 3 shoqata përfshirë dhe atë të transporti publik qytetas deklaruan se zbatimi i protokolleve është i pamundur, ndaj nuk do të nisin funksionimin e tyre.
Në një prononcim për TV SCAN, kreu i Shoqatës së Transportit Urban dhe Interurban Kamëz Veri, Dashnor Memaj, tha se ende nuk ka një vendim zyrtar , por vetëm komunikimin e minister në rrjetet sociale. Po ashtu, ai deklaroi se nuk do të ofrojnë shërbim deri në plotësimin e kërkesave të tyre, që lidhen me heqjen e akcizës së naftës, uljen e TVSH-së dhe faljen e taksave dhe tarifave vendore.
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.