Riformatohet Autoriteti Kombëtar i Ushqimit – Gjobat mbi 3 mijë dollarë ndaj kompanive, në dorë të Komisionit të Ministrisë së Bujqësisë
Një seri ndryshimesh janë miratuar nga Këshilli I Ministrave për mënyrën e funksionimit dhe drejtimit të Autoritetit Kombëtar të Ushqimit. Ndryshimet prekin prekin kompetencat e Drejtorit, Bordit Drejtues të AKU, si dhe komiteti shkencor e panelet shkencorë.
Ndryshimet përcaktojnë edhe mënyrën e funksionimit të Komisionit të Shqyrtimit të Masave Administrative, i përbërë nga 5 anëtarë, i cili do të përbëhet nga drejtori i Përgjithshëm i AKU-së, që do jetë edhe kryetar i komisionit; një përfaqësues i njësisë që mbulon çështjet juridike, sekretar i komisionit; një përfaqësues i njësisë përkatëse që mbulon çështjen e inspektimit që ankimohet; dhe dy specialistë nga njësitë e tjera të Drejtorisë së Përgjithshme.
Gjithsesi, ky Komision do të ketë rol të limituar, pasi do të ketë të drejtë të shqyrtojë vetëm gjobat e vogla deri në vlerën e 300 mijë lekëve, apo rreth 3 mijë dollarëve. Gjobat më të mëdha se kjo vlerë do të jenë nën kompetencën e Ministrisë së Bujqësisë.
“Komisioni i Shqyrtimit të Masave Administrative ka kompetenca të përgjithshme dhe shqyrton të gjitha ankimet administrative, me përjashtim të ankimeve administrative ndaj vendimeve që kanë gjoba/sanksione financiare mbi 300 000 (treqind mijë) lekë, të cilat shqyrtohen nga Komisioni i Shqyrtimit të Masave Administrative, në ministrinë përgjegjëse për ushqimin.”, përcakton vendimi i Qeverisë.
Lorenc Rabeta / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.