Rigjallërimi i hekurudhës – Gati projekti për Durrës-Rrogozhinë, kosto 52 milionë euro
Pas linjës hekurudhore Tiranë-Durrës-Rinas, pritet të nisë dhe rehabilitimi i linjës Durrës-Rrogozhinë, duke i dhënë një hov të ri transportit hekurudhor në vend. Sipas studimit të Realizueshmërisë për Rehabilitimit e linjës Durrës-Pogradec, segmenti prej 33.5 km nga qyteti bregdetar deri në Rrogozhinë është zgjedhur si prioritar, ndërsa kosto e rehabilitimit vlerësohet në 52 milionë euro.
Përgatitja e studimit është mundësuar nga Komisioni Evropian, ndërkohë që qeveria shqiptare ka vendosur të vijojë me zhvillimin e projektit të rehabilitimit të të gjithë linjës hekurudhore dhe për këtë arsye ka bërë kërkesë së fundmi pranë WBIF për dy grante të tjera asistence teknike. I pari, për përgatitjen e projektit të zbatimit për segmentin prioritar nga Durrësi në Rrogozhinë dhe i dyti, për përgatitjen e projektit paraprak, analizës kosto përfitim dhe vlerësimit të ndikimit në mjedis dhe social të pjesës së mbetur, segmenti hekurudhor nga Rrogozhina – Pogradec, përfshirë ndërtimin e linjës të re 2.8 km që lidh Linin me kufirin e ish Republikës Jugosllave të Maqedonisë.
Sipas Ministrisë së Infrastrukturës dhe Energjisë, rehabilitimi i këtij segmenti do të përmbushë standardet e projektimit të Rrjetit Ndër Evropian me shpejtësi 100km/h dhe ngarkesë aksi 22.5 ton. Koha e udhëtimit do të reduktohet nga 60 minuta në 32 minuta, ndërsa lëvizja përgjatë tij pritet të arrijë 330,000 pasagjerë dhe 1,100,000 ton mallra deri në vitin 2047. Vlera e përllogaritur në kursimin e kohës për përdoruesit e sistemit të transportit shqiptar do të jetë EUR 0.65 milion për udhëtarët dhe EUR 15.3 milion për transportin e mallrave. Kursime shtesë nga zvogëlimi i kostos të operimit të automjeteve në transportin rrugor përllogariten në EUR 0.5 milion për udhëtarët dhe EUR 8.7 milion për transportin e mallrave
Ola Mitre/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.