Rihapet qeveria amerikane – Trump tërhiqet pa marrë paratë e murit

Kryetarja e Dhomës së Ulët të Parlamentit amerikan, Nancy Pelosi firmosi marrëveshjen për të rihapur qeverinë amerikane. Kjo marrëveshje financon qeverinë pasi Presidenti amerikan, nën presion të vazhdueshëm, ra dakord t`i japë fund 35 ditëve me qeverinë e mbyllur. Trump u tërhoq kështu përfundimisht, pa marrë 5.7 miliardë dollarët që kërkonte për ndërtimin e murit me Meksikën. Kjo gjë i jep një fitore politike të padiskutueshme demokratëve.

Tërheqja e Trump, një njeri i cili rrallëherë ka lënë hapësira për të bërë dicka të tillë, erdhi vetëm tre ditë pasi ai brohoriti me të madhe se, “Ne nuk do të tërhiqemi”. Marrëveshja kaloi në fillim në Senatin e kontrolluar nga Republikanët, e më pas në Kongresin e demokratëve. Kjo gjë i hap rrugën një debati edhe më të nxehtë mes politikbërësve për menaxhimin e situatës së sigurisë në kufirin me Meksikën.

Gjithsesi, pavarësisht marrëveshjes, Donald Trump u zotua se mbyllja e qeverisë do të rifillojë në datën 15 Shkurt në rast se ai do të jetë i pakënaqur me komisionin bipartizan për diskutimet mbi kufirin me Meksikën. Madje, Trump nënvizoi se, mund të deklarojë gjendjen e emergjencës për të siguruar paratë e murit.

Roel Korkuti/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.