Rikonstruksion i sistemit të muzeve në Gjirokastër – FSHZH informon mbi situatën aktuale të punimeve

Fondi Shqiptar i Zhvillimit informon se me financim të Bankës Botërore dhe Qeverisë Shqiptare aktualisht po restauron 4 objekt-investime duke ndërthurur simbiozën e të vjetrës me të renë në ruajtjen e karakteristikave historike pasi objektet janë amortizuar përgjatë viteve, ndërhyrjet konsistojnë në restaurim/rindërtim kalldrëmi, restaurimi/konsolidimi i mureve anësore, ndriçim estetik etj.

Sipas informacionit aktualisht vazhdon restaurimi i kalldrëmeve në rrugën ‘Sado Meleqi’ si dhe rrugën ‘Ramadan Mane’ dhe për këtë të fundit paralelisht po punohet dhe për restaurimin e mureve prej guri ndërsa në muzeun ‘Ismail Kadare’ kanë përfunduar punimet për shtrirjen e rrjeteve të ndriçimit, internetit, mbrojtjes nga zjarri, kamerave, ngrohjes etj.

FSHZH njofton se në projekt përfshihet edhe Muzeu Etnografik, ku po vazhdojnë punimet e suvatimit dhe patinimit të mureve të gurit dhe punime restaurimi, si dhe punime të rikonstruksionit të çatisë.

“Muzeu Etnografik është në 40% të punës tashmë. Këtu kemi edhe pjesë të pllakave me shkrime nga Edward Lear të cilat do të jenë pjesë e shesheve ku do jetë i gjithë itinerari i Edward Lear”, ka sqaruar gjatë një inspektimi në terren Ministrja e Kulturës, Elva Margariti.

“Si një qendër e rëndësishme administrative, ekonomike dhe kulturore nëpërmjet këtij projekti synohet të ruhen vlerat e objekteve historike, si atraksione gjithmonë edhe më tepër të lakmuara në shërbim të turistëve”, shkruhet në njoftim.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.