Rikonstruksioni i rrugës hyrëse në Ulëz – FSHZH: Përfundon në Korrik të këtij viti
Rikonstruksioni i rrugës hyrëse të Ulzës përgjatë aksit rrugor Milot-Burrel do të përfundojë në Korrik të këtij viti. Rruga më gjatësi 2.2 kilometra është pjesë e Parkut Natyror Rajonal Ulëz dhe është një investim i qeverisë shqiptare e Bankës së Këshillit të Europës.
Sipas Fondit Shqiptar të Zhvillimit, rruga e ndërtuar fillimisht në vitin 1995 është zgjeruar, janë ndërtuar veprat e artit për disiplinimin e ujërave sipërfaqësorë dhe nëntokësorë si dhe do të pajiset me barriera mbrojtëse dhe elementë të tjerë të sigurisë rrugore.
Ndërkohë, FSHZH më herët në këtë zonë ka kryer investime në ndërtimin e ujësjellësit dhe sistemin e shpërndarjes së ujit të pijshëm, ndërtimin e kanalizimeve, rikonstruksionin e sheshit qendror dhe ndërtesave shtetërore.
2000 banorë të Ulzës janë përfitues të drejtpërdrejtë të këtyre investimeve, ndërsa numri i atyre të cilëve përfitojnë në mënyrë indirekte kap shifrën e 49 mijë banorëve.
Pas shpalljes Park Natyror Rajonal, Ulza tashmë është shndërruar në një destinacion turistik jo vetëm për vizitorë të qyteteve të tjera të vendit, por edhe nga turistë të huaj italianë, francezë, gjermanë, çekë, etj.
Ndërkohë, vetëm disa ditë më parë Ministri i Turizmit dhe Mjedisit, Blendi Klosi së bashku me Agjencinë Kombëtare të Zonave të Mbrojtura, Bashkinë e Matit dhe Bashkinë e Mirditës, Fondin Shqiptar të Zhvillimit, dhe Agjencinë Rajonale të Zhvillimit 2 nënshkruan marrëveshjen për krijimin e Ulza Eco Park, me qëllim promovimin e zonës si një destinacion turistik kombëtar.
Shndërrimi i Ulzës në një destinacion turistik të mirëfilltë pritet të nxisë zhvillimin e ekonomive familjare përmes shitjes së punimeve artizanale, produkteve bujqësore, ndërtimit të bujtinave për turistët, etj.
Sipas FSHZH-së, Ulëza konsiderohet si një histori suksesi kur bëhet fjalë për qasjen e integruar të investimeve në infrastrukturë që sjellin zhvillimin e një zone dhe rigjallërimin ekonomik e social të saj.
G.D/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.