Rikonstruktohen ambientet e ish-Degës Doganore Tiranë – Ndërhyrjet që do të kryhen
Ambientet e ish-Degës së Doganës Tiranë do ti nënshtrohen së shpejti rikonstruksionit. Drejtoria e Përgjithshme e Doganave ka hapur zyrtarisht procedurat e tenderimit për këtë investim, duke vënë në dispozicion një fond limit prej 18.1 mln lekësh.
Afati i zbatimit të grafikut të punimeve përcaktohet 3 muaj kalendarikë, kurse operatorët ekonomikë do të mund të dorëzojnë kërkesat e tyre brenda datës 20 prill.
Më konkretisht, do të rikontruktohet objekti ku ka zhvilluar aktivitetin Laboratori Doganor deri në vitin 2016, ku gjendja e tij paraqitet e amortizuar. Në këtë kuadër, grafiku i punimeve përfshin prishjen e mureve dhe ndërtimin e mureve të reja.
Po ashtu, do të bëhet edhe zëvendësimi i të gjitha dyerve dhe dritareve në të ambientet e godinës, si dhe do të kryhen ndërhyrje edhe në shkallët e jashtme kryesore të godinës. Njëkohësisht do të bëhet edhe hidroizolimi i tarracës së objektit, si dhe do të ndërtohen gjithashtu edhe rampa e invalidëve anash shkallëve. Pjesë e punimeve janë edhe fasadat, të cilat do të risuvatohen plotësisht si dhe do të bëhet ndërkohë edhe zëvendësimi i pllakave në të gjitha nyjet ekzistuese.
G.D/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.