Rikonstruktohet klinika e “mushkërive” – Manastirliu: Vlera e investimit në 60 mln lekë. Nuk ka mungesë të herceptinës
Nis rindërtimi i klinikës së specializuar për sëmundjet e mushkërive në Tiranë. Në këtë klinikë trajtohen pacientë nga i gjithë vendi duke bërë që fluksi ditor gjatë sezonit të dimrit të jetë në 300 pacientë. Ministrja e Shëndetësisë dhe e Mbrojtjes Sociale ka inspektuar nga afër punimet, vlera e të cilave së bashku me aparaturat e reja shkon në 60 milionë lekë.
“Kemi vendosur që me një investim të buxhetit të shtetit për vitin 2018, jo vetëm për 16 qendra shëndetësore të Tiranës dhe ambulancës, por gjithashtu dhe për dispacerinë, si një qendër shëndetësore e specialiteteve. Të jetë ky investim, rreth 60 milionë, që nuk do të jetë vetëm investimi në infrastrukturë, por gjithashtu dhe investim në pajisje biomjekësore të teknologjisë së lartë”, u shpreh ministrja.
E pyetur nga televizioni SCAN në lidhje me mungesën e herceptinës në repartin e onkologjikut në QSUT, Manastirliu u shpreh se nuk ka mungesa. Sipas saj në këtë repart trajtohen rreth 150 gra në ditë dhe për të gjitha ofrohet shërbimi i duhur.
“Jo vetëm që nuk ka mungesa përsa i përket receptinës në shërbimin onkologjik, këtë e kanë pohuar mjekët, por unë dua t’ju them se ne tashmë kemi një arritur një stad shumë më të mirë të ofrimit të shërbimeve sa i përket trajtimit me kemiopreparate për kancerin e gjirit, pasi përpos dozës së flakonit të receptinës, kemi përfshirë në librin e ri të rimbursimeve gjithashtu dhe në formdozë subkutanin, një formëdozë shumë e thjeshtë për t’u aplikuar për pacientët me një kohë shumë më të shkurtër. Nuk ka asnjë mungesë në shërbimin onkologjik sa i përket trajtimit me herceptinë për gratë që vuajnë nga kanceri”, tha Manastirliu.
Ministria e Shëndetësisë po investon për fuqizimin e kujdesit Parësor ndërsa ka nisur programin kombëtar të rehabilitimit të 300 qendrave shëndetësore. Vetëm gjatë këtij viti do të rehabilitohen 80 qendra shëndetësore në qarkun e Tiranës.
Entela Barjamaj/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.