Rikonstruktohet së shpejti fshati Marinëz – Bashkia hap tenderin. Ndërhyrjet që do të kryhen

Fshati Marinëz në Bashkinë e Roskovecit do të marrë së shpejti një pamje të re.  Bashkia ka hapur procedurat e tenderimit për rikualifikimin urban të tij, për të cilin është vënë në dispozicion një fond limit prej më shumë se 10.2 milionë lekësh.

Financimi i parashikuar për vitin 2019 është 833.3 mijë lekë, ndërsa për vitin 2020 mbi 9.4 milionë lekë. Kohëzgjatja e kontratës për zbatimin e punimeve parashikon një periudhë kohore prej 6 muajsh nga firmosja e saj.

Duke qenë se pozita gjeografike e këtij rajoni shihet shumë e favorshme për zhvillimin ekonomik, është parë si domosdoshmëri edhe rikualifikimi urban i kësaj zone.

Grafiku i punimeve përfshin sistemimin dhe asfaltimin e rrugës “Llambi Marku” si dhe ndërhyrje të rrugicave që kryqëzohen me të: “Xoxi Prifti”, “Gani Pira”, “Risk Cjapi”, “Loni Mata”, “Ndoni Suku”.

Nga detajet e investimit, ky i fundit po ashtu parashikon edhe vendosjen e sistemit të disiplinimit të ujërave të bardha dhe ndriçimit rrugor. Po ashtu, pjesë e projektit është edhe krijimi i një hapësire rekreative të gjelbëruar me stola, pemë dhe trotuare kalimi.

Aktualisht, gjendja e rrugës paraqitet e amortizuar çka vështirëson qarkullimin normal të banorëve të zonës dhe të ekonomisë së zonës, veçanërisht me nxjerrjen në treg të prodhimeve bujqësore. Kjo, pasi rajoni ka shërbyer tradicionalisht si zonë e prodhimit të lartë bujqësor dhe blegtoral për tregun vendas por edhe për eksport.

Kjo rrugë lidh hapësirat urbane të qytetit dhe rehabilitimi i saj pritet të lehtësojë ndjeshëm qarkullimin e banorëve të zonës.

Genta Dobra/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.