Rikonstruktohet ujësjellësi në Mbrostar – Përfitojnë mbi 10 mijë banorë të 6 fshatrave
10 500 banorë të gjashtë fshatrave të zonës së Mbrostarit në Bashkinë Fier do të përfitojnë tashmë furnizim më të mirë me ujë pas rikonstruksionit të ujësjellësit. Verri, Kallmi i Madh, Kallmi i Vogël, Makaj, Mujall, Petova janë edhe fshatrat që përfshin ky investim me vlerë rreth 556 500 euro.
Sipas ministrit të Infrastrukturës dhe Energjisë, Damian Gjiknuri, sistemi i ri i furnizimit me ujë në këtë zonë është një tjetër produkt që vjen në kuadër të paketës së investimeve sociale e mjedisore që qeveria negocioi me konsorciumin TAP në Shqipëri.
“Rrjeti mëparshëm i amortizuar është zëvendësuar nga e para ndërsa për të rritur kapacitetin furnizues të ujësjellësit, janë hapur dy puse të reja duke rehabilituar edhe depon e ujit në Petovë.”
Ndërkohë, menaxherja e TAP-it për Shqipërinë, Michele Elia tha se ky është një nga investimet më të mëdha të TAP. Gjithashtu shtoi se ky i fundit mbështet zhvillimin e komuniteteve lokale përgjatë rrugës së tubacionit nëpërmjet investimeve të shumta sociale dhe mjedisore.
“Sistemi i ujësjellësit në Mbrostar është një nga investimet më të mëdha të TAP në Shqipëri dhe ne jemi të kënaqur që do të përmirësojë kushtet e jetesës së më shumë se 10.000 njerëzve. Ne do të vazhdojmë të mbështesim komunitetet lokale në partneritet me Ministrinë e Infrastrukturës dhe Energjetikës dhe autoritetet lokale, “shtoi Elia.
G.D/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.