Rikthehet “ngadalësimi kinez” – Ekonomia pritet në 6.3% në 2019. Ndikon tregtia dhe kërkesa e dobët
Ekonomia kineze pritet të ngadalësohet mëtej këtë vit, ndërkohë që kërkesa e brendshme dobësohet dhe eksportet goditen nga tarifat amerikane, sipas një sondazhi të Reuters që përforcon këndvështrimin që Pekini do të duhet të shtojë stimujt.
Ekonomia e dytë më e madhe në botë e nisi pozitivisht 2018-ën, por presionet u shtuan ndërkohë që trajtimi i huadhënies së rrezikshme rriti kostot e huamarrjes dhe vështirësoi financimin e kompanive.
Paralelisht, lufta tregtare me Shtetet e Bashkuara, cënoi sektorin e tregtisë në Kinë dhe goditi bizneset e konsumatorët. Ngadalësimi i kërkesës botërore po ndikon gjithashtu te eksportet kineze.
Rritja ekonomike në Kinë pritet të ngadalësohet në 6.3% këtë vit, që do të ishte norma më e ngadaltë në 29 vite. Për vitin 2018, ekonomia vlerësohet të jetë rritur me 6.6%, ndërsa në 2017-ën, norma u regjistrua në 6.9%.
Rinisja e bisedimeve mes Kinës dhe SHBA ka rritur optimizmin që Washingtoni mund të bie dakord për pezullim të tarifave ndaj mallrave kinezë. Megjithatë, marrëveshja për të përfunduar konfliktin nuk ka gjasa të ndodhë deri në afatin që është muaji Mars.
Edhe nëse të dyja palët arrijnë një marrëveshje tregtare, analistët thonë se kjo do të përbënte një lehtësim të vogël për ekonominë kineze, ndërkohë që Pekini duhet të trajtojë kërkesën e dobët brenda vendit dhe investimet.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.