Rikthehet Varoufakis – Do të kandidojë në zgjedhjet e muajit Maj 2019 në Gjermani
Ish-ministri grek i Financave, Yanis Varoufakis, i njohur për kritikat e tij ndaj masave shtrënguese në Eurozonë në kulmin e krizës së borxhit, pritet të kandidojë në zgjedhjet europiane në Gjermani. Lëvizja Demokracia në Europë, që Varoufakis themeloi në vitin 2016, e zgjodhi kandidat për zgjedhjet që do të zhvillohen në Maj 2019.
“Është një nder të pranoj kandidaturën për zgjedhjet në Parlamentin Europian. E pranoj kandidaturën time për shkak se simbolizon politikat e reja transnacionale që duhen në Europë.”
Akademiku që u bë i famshëm gjatë krizës së borxhit, i ka përshkruar masat shtrënguese ndaj Greqisë nga kreditorët si një “mbytje” fiskale. Varoufakis, i cili është përplasur vazhdimisht me homologun gjerman, Wolfgang Schaeuble, tha se qendra politike në Gjermani, është e kërcënuar për shkak të masave shtrënguese.
“Në letër, Gjermania është e mbushur me para. Qeveria Federale ndodhet në suficit, bankat janë të mbushura me para, korporatat po kursejnë para dhe familjet gjithashtu. Lind pyetja se pse qendra politike në Gjermani ndodhet në vështirësi. Kjo vjen për rrjedhojë se Europa, ndodhet në krizë sistematike. Vetë gjermanët kanë qenë viktima të masave shtrënguese në Europë.”
Varoufakis shtoi se ai kërkon të kanalizojë paranë, që mund të financohet edhe përmes emetimit të obligacioneve, në politika të gjelbra dhe për të trajtuar ndryshimin klimatik. Varoufakis, që dha dorëheqjen si ministër i Financave në vitin 2015 për kushtet e programit të shpëtimit, e ka krahasuar ndihmën ndaj Greqisë me traktatin e Versajës.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.