Rimbursimi i medikamenteve – FSDKSH, transparencë vetëm për tre muajt e parë të vitit
Nga fillimi i 2018 e aktualisht Fondi i Sigurimit të Detyrueshëm të Kujdesit Shëndetësor ka publikuar vetëm shumat financiare që janë paguar për rimbursimet në tre muajt e parë të vitit. Konkretisht, në muajin janar rimbursimi ka qenë mbi 939 milionë lekë, në shkurt mbi 383 milionë dhe në muajin mars 2018 vlera e rimbursimit ka qenë mbi 894 milionë lekë. Televizioni SCAN ka kontaktuar me përfaqësues të Fondit, në lidhje me shkakun se pse ky institucion nuk vijon më me procesin e transparencës në lidhje me vlerat mujore të rimbursimit.
Sipas Fondit, në faqen e internetit janë publikuar të dhënat deri në muajin prill 2018, ndërsa për muajin maj duhet më shumë kohë pasi ka hyrë në fuqi lista e re e rimbursimit. Në fakt me një vëzhgim në faqen zyrtare të fondit janë vetëm tre muaj të publikuar sa i përket rimbursimit të medikamenteve. Praktika e mëparshme e punës në lidhje me publikimin e rimbursimeve bëhej në 10 ditët e para të muajt pasardhës për vlerat e rimbursuara në muajin paraardhës.
Fondi i Sigurimit të Detyrueshëm të Kujdesit Shëndetësor është një nga institucionet shëndetësore, i cili në vitin 2015 u përball me një skandal sa i përket rimbursimit të barnave. Nga punonjës të këtij institucioni në bashkëpunim edhe me mjekë e farmacistë u ekzekutuan një sërë recetash fiktive për rimbursimin e medikamenteve.
Entela Barjamaj/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.