Rimëkëmben fabrikat në Eurozonë – Shtatori rezulton i fortë kryesisht prej fuqizimit të Gjermanisë
Rimëkëmbja e manifakturës në Eurozonë ka rifituar vrull në muajin Shtator, kryesisht prej fuqizimit në Gjermani, ndërkohë që fabrikat e rajonit kanë pasur rritje të kërkesës pas lehtësimit të disa masave të karantinës. Megjithatë, rritja e fundit e rasteve me Covid-19 ka bërë që të rivendosen disa masa. Indeksi PMI u rrit në 53.7 pikë në Shtator, nga 51.7 në Gusht, që është niveli më i lartë që prej gushtit 2018. Ky shihet si një tregues i mirë i rritjes ekonomike. Ekonomistët thonë se rimëkëmbja do të ishte shumë më modeste pa Gjermaninë, që përbënte thuajse gjysmën e rritjes totale për Shtatorin. Të dhënat më herët gjatë javës treguan se prodhimi i fabrikave në Gjermani, ekonominë më të madhe të Evropës, ndodhet në rritje të fortë, në kontrast me Francën dhe Spanjën. Pa Gjermaninë, manifaktura do të tregonte nivelin më të ulët që prej Qershorit. Kërkesa është rritur në nivelin më të lartë në 2 vite e gjysmë, duke shtuar punën tek fabrikat. Megjithatë, humbjet në vendet e punës kanë zbehur optimizmin në 12 muajt e ardhshëm.
Klevis Llaha – SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.