Rimëkëmbet inflacioni në Eurozonë – Dështon të surprizojë politikëbërësit. Presione modeste në çmime
Inflacioni në Eurozonë u rimëkëmb gjatë Qershorit, duke ofruar pak lehtësim për Bankën Qendrore Europiane. Megjithatë, treguesi dështoi të arrijë objektivat e politikëbërësve. Ndërkohë që ekonomia dhe presionet në çmime janë ngadalësuar përgjatë vitit, presidenti i BQE, Mario Draghi, ka thënë se institucioni është gati për më shumë stimuj në të ardhmen e afërt. Inflacioni qëndroi në 1.2%, brenda pritshmërive dhe poshtë objektivit të Bankës Qendrore Europiane prej rreth 2%. Megjithatë, treguesi bazë, që heq komponentët e luhatur të energjisë dhe ushqimeve , u rrit në 1.2%, nga 1% që ishte në Maj.
Ndërkohë që rimëkëmbja e inflacionit bazë surprizoi, rezultati ishte në linjë me pritshmëritë dhe poshtë nivelit të muajit Prill, çka tregon se presionet në çmime janë ende modeste pavarësisht stimujve të jashtëzakonshëm. Eurozona ka krijuar mbi 10 milionë vende pune që prej krizës së borxhit dhe punësimi ndodhet në nivele rekord. Pagat janë rritur gjithashtu, duke krijuar mundësinë për rritje të çmimeve. Megjithatë, inflacioni qëndron i dobët ndërkohë që bizneset janë gati të sakrifikojnë marzhet e tyre se sa të rrisin çmimet. Problemi qëndron se ndërsa çmimet dështuan të rriten në periudhën e rritjes së fortë ekonomike, nuk ka gjasa që kjo të ndodhë gjatë ngadalësimit. Ekonomia e Eurozonës pritet të rritet me vetëm 1.2% këtë vit, thuajse sa gjysma e vitit 2017.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.