Rimëkëmbet sektori i shërbimeve në BE / Kërkesa dhe heqja e karantinës sjellin rritjen më të madhe në 15 vite

Aktiviteti i biznesit në Eurozonë është rritur me normën më të shpejtë në 15 vite gjatë muajit, ndërkohë që zbutja e masave të karantinës dhe rritja e kërkesës nga konsumatorët e bllokuar, nxitën një rritje gjigante në industrinë e shërbimeve.  Kur koronavirusi po përhapej shpejtë, qeveria vendosi masa të karantinës dhe inkurajoi qytetarët që të qëndrojnë në shtëpi, duke detyruar industrinë e shërbimeve që të mbyllej.  Megjithatë, programi i vaksinimit po merr vrull në rajon dhe barra tek shëndeti publik është zbutur, duke lejuar heqjen e disa masave të kufizimit tek firmat e shërbimit.  Kjo solli një rritje të indeksit PMI në 59.2 pikë, nga 57.1, indeks që formulohet përmes mijëra sondazhesh dhe që shihet si një tregues i mirë i gjendjes ekonomike. Kjo është norma më e lartë që prej Qershorit 2006.  Rritja e aktivitetit të manifakturës arriti nivelin rekord të muaji Maj.   Megjithatë, ndërprerjet në anën e ofertës dhe kërkesa gjigante, e kanë bërë tregun të anojë nga shitësit për lëndët e para që u duhen fabrikave.  Indeksi i çmimit të inputit në fabrika u rrit në 88 pikë nga 87.1, që është edhe norma më e lartë që kur nisën sondazhet në vitin 1997.   Analistët thonë se rimëkëmbja e fortë dhe e shpejtë, në Europë dhe në të gjithë botën, nënkupton se firmat po hasin vështirësi për t’i bërë ballë kërkesës së madhe, me mungesë në lëndë të para dhe staf.

Klevis Llaha – SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.