Rimëkëmbja botërore, e brishtë / G20 paralajmëron për vaksinimin e pabarabartë dhe variantet e reja
Shfaqja e varianteve të reja të koronavirusit dhe aksesi i pakët në vaksina tek vendet në zhvillim, kërcënojnë rimëkëmbjen e ekonomisë botërore, sipas ministrave të financave të G20. Mbledhja e liderëve financiarë në Venecia, Itali, ishte takimi i parë fizik që kur nisi pandemia. Tek vendimet e marra, përfshihen rregullat e reja që synojnë ndalimin e kompanive ndërkombëtare që të zhvendosin fitimet tek parajsat fiskale.
Liderët e G20 ranë gjithashtu dakord për një normë minimale tatimore korporatave në nivel botëror prej 15%, ç’ka do të përfundohet në samitin në Romë në Tetor. Komunikata e fundit bëri të ditur se perspektiva ekonomike botërore është përmirësuar që prej bisedimeve në muajin Prill, falë prezantimit të vaksinave dhe paketave të mbështetjes ekonomike, por pranoi gjithashtu brishtësinë përballë varianteve të reja si ai Delta. “Rimëkëmbja karakterizohet nga divergjenca të mëdha mes vendeve dhe qëndron e ekspozuar ndaj rreziqeve, kryesisht përhapja e varianteve të reja të Covid-19 dhe programet e ndryshme të vaksinimit në botë”- thuhej në deklaratën e përgjithshme. Liderët e 20 vendeve më të pasura, ndërkohë që theksuan mbështetjen për shpërndarjen e barabartë të vaksinave, ata nuk propozuan masa konkrete. Ndryshimet në programet e vaksinimit mes të pasurve dhe të varfërve në botë, qëndrojnë të mëdha. Drejtori i Organizatës Botërore të Shëndetësisë, Tedros Adhanom Ghebreyesus, e ka quajtur këtë divergjencë një “krizë morale” që pengon dhe përmbajtjen e virusit.
Klevis Llaha – SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.