Rimëkëmbja e Eurozonës – Viti më i mirë në një dekadë, performanca pritet të vazhdojë
Ekonomia e Eurozonës do të tregojë vitin më të mirë në një dekadë dhe do ta ruajë këtë performancë drejt 2018-ës, sipas një sondazhi të ekonomistëve nga Reuters. Inflacioni shënoi 1.4% dhe pritet të qëndrojë poshtë objektivit të Bankës Qendrore Europiane deri në gjysmën e dytë të 2019-ës, sipas sondazhit të ndërmarrë në periudhën 13-16 Nëntor.
Rritja ekonomike në Eurozonë ka qenë e fortë këtë vit, duke kaluar Shtetet e Bashkuara dhe Britaninë për të parën herë që prej krizës financiare. Rimëkëmbja është sinkronizuar në të gjithë ekonomitë e Eurozonës. 90% e ekonomistëve thanë se kanë besim se rimëkëmbja aktuale në Eurozonë do të zgjasë në të ardhmen e afërt.
Sipas tyre, të gjithë elementët janë pozitivë për Eurozonën, përfshirë pengesat më të ulëta fiskale, politikat monetare lehtësuese, nivel të qëndrueshëm të euros dhe besim të fortë mbi ekonominë. Rezultatet tregojnë se ekonomistët nuk shqetësohen ndaj rreziqeve politike, përfshirë negociatat me Britaninë për daljen nga Bashkimi Europian. Perspektiva e qëndrueshme për ekonominë mbështet vendimin e muajit të kaluar të Bankës Qendrore Europiane për të përgjysmuar blerjet mujore të obligacioneve.
Kjo ka shtuar pritshmëritë për vlerësim të mëtejshëm të euros në vitet që vijnë, sipas një sondazhi të Reuters drejt analistëve të këmbimit valutor më herët gjatë muajit. Sondazhi i fundit tregoi se BQE pritet të mbajë normën e rifinancimit në 0% dhe për depozitat në -0.4% deri në fund të vitit që vjen.
Projeksionet mesatare për rritje qëndrojnë në 2.2% këtë vit, 1.9% në 2018-ën dhe 1.7% pas dy vitesh, të gjitha në rritja në krahasim me sondazhet e mëparshme.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.