Rimëkëmbja e transportit ajror – Fluturimet “me sytë” nga lehtësimi i masave, shtetet po japin sinjalet e para pozitive

Shifrat e tregut ajror tregojnë se rimëkëmbja e industrisë së aviacionin civil mbetet e vështirë, teksa pak javë më parë edhe Eurostat vlerësoi se të dhënat më të fundit në fluturimet tregtare nuk tregojnë shenja të qarta të rikuperimit. Ndërkaq, me afrimin e sezonit turistik, si dhe me lehtësimin e disa masave nga vende të ndryshme, pritet një rritje e numrit të pasagjerëve, duke zbutur pasojat negative.

Sikurse vitin e kaluar, Shqipëria ka njoftuar se nuk do të bllokojë hyrjen e asnjë pasagjeri në territor, duke synuar një sezon të suksesshëm turistik, ndërsa nuk ka vendosur asnjë masë detyruese qoftë të drejtim të testit negativ për COVID-19, vaksinimit apo kalimit të infeksionit. Nga ana tjetër, shumë shtete po japin sinjale për lehtësimin e masave edhe për shtetasit shqiptarë, të cilët udhëtojnë vetëm me pasaporta biometrike. Një prej tyre është Spanja, që në datën 7 qershor njoftoi hapjen e dyerve për ata shtetas shqiptarë që kanë kryer të dyja dozat e vaksinës.

Sipas këtij rregulli të gjithë qytetarët shqiptarë me pasaportë biometrike, që kanë çertifikimin e dy vaksinave të kryera, të paktën 14 ditë përpara udhëtimit, hyjnë në Spanjë pa asnjë kufizim. Dozat e vaksinave të njohura nga autoritetet e Spanjës përfshijnë Pfizer-BioNTech, Moderna, AstraZeneca, Janssen, Sinopharm dhe Sinovac-CoronaVac. Edhe fëmijët e pavaksinuar deri në 6 vjeç, gjithashtu do të lejohen të hyjnë në Spanjë për sa kohë që ata po udhëtojnë së bashku me prindërit e tyre të vaksinuar. Ndërkaq, edhe ministri grek i Turizmit ka deklaruar se nga data 15 qershor do të lejohen fluturimet drejt Athinës dhe Selanikut, duke u bazuar në situatën e përmirësuar epidemiologjike të Shqipërisë.

Ola Mitre / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.