Rindërtimi i Thumanës, Rama: Do ndërtohen shkolla dhe shtëpi me infrastrukturë të lartë
Kryeministri Edi Rama ka inspektuar punimet në Thumanë për rindërtimin e saj pas tërmetit të 26 nëntorit. Kreu i qeverisë premton që 26 nëntori i këtij viti do të jetë ndryshe për zonat e prekura nga tërmeti.
Nëntori i këtij viti do të jetë ndryshe për zonat e prekura nga tërmeti i 26 nëntorit të 2019-ës , Ky është premtimi i kryeministrit Edi Rama teksa inspektoi punimet në Thumanë. Kreu i qeverisë tha se do të hapen shumë shkolla dhe shtëpi dhe se kantieri i infrastrukturës do të garantojë që banesat e reja të ngrihen mbi një sistem ujësjellësi, kanalizimesh, ndriçimi e rrjeti rrugor të standardeve më të larta.
“Fatkeqësisht interferimi i epidemisë na vonoi pak, kryesisht për garat, pasi garat kanë qenë të hapura dhe kompanitë e kanë pasur të pamundur të marrin pjesë, sidomos kompanitë e huaja dhe kanë kërkuar shtyrje, gjë që na ka pezulluar dhe procese të tjera, por ajo që është e rëndësishme është që absolutisht në 26 nëntor, 1 vit nga tragjedia, gjërat do të jenë dukshëm ndryshe e në 26 nëntor do hapim dyert e shumë shkollave dhe do të hapim dyert e jo pak shtëpive edhe pse do të na duhet të vazhdojmë punën e të kompletojmë gjithçka vitin e ardhshëm”.
Ndërkohë, Ministri për Rindërtimin, Arben Ahmetaj tha se Fondi Shqiptar i Zhvillimit po punon për firmosjen e marrëveshjeve me kompanitë që do të angazhohen me ndërtimin e lagjeve të reja si kjo e Thumanës.
“Fondi Shqiptar i Zhvillimit mund të fillojë marrëveshjen kuadër për rindërtimin e banesave kolektive dhe mund të ecë më të njëjtën logjikë si me shkollat, pra, me projekt ide, menjëherë të prokurohen. Po ta shikoni, programi i shkollave ka ecur me shumë shpejtësi, krahasimisht me çdo program tjetër, edhe për shkak të këtij instrumenti që ne vendosëm për herë të parë me FSHZH.
“Thumana e Re” do të ngrihet në një sipërfaqe prej rreth 15 hektarësh 5 kilometra do të jenë rrugë lidhëse, bashkë me sinjalistikën përkatëse dhe 3500 metra linearë do të jenë kanalizime dhe linjë elektrike.
Nertila Doko / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.