Rindërtimi nga tërmeti i 26 nëntorit – 5 milionë dollarë bashkive të Kavajës dhe Kamzës për banesat e dëmtuara
Bashkitë e Kamzës dhe Kavajës kanë përfituar një fond prej rreth 5 milionë dollarësh për projektet e rindërtimit të banesave të dëmtuara nga tërmeti i 26 nëntorit. Përmes një vendimi që mban datën 17 Qershor, Këshilli i Ministrave ka miratuar përdorimin e fondit të rindërtimit, në masën prej 510 240 000 (pesëqind e dhjetë milionë e dyqind e dyzet mijë) lekësh, për financimin e rikonstruksionit të banesave individuale dhe njësive të banimit në ndërtesa (pallat) për ato individë të cilët përfitojnë nga grantet e rikonstruksionit, banesat e të cilëve janë klasifikuar si objekte të dëmtuara rëndë apo të dëmtuara lehtë dhe që nuk duhen rindërtuar nga e para si pasojë e fatkeqësisë natyrore, në Bashkitë Kamzë dhe Kavajë.
Efekti financiar i këtyre kostove do të përballohet nga pjesa e financuar nga grantet e fondit të rindërtimit, miratuar për vitin 2020, dhe do t’u kalojë bashkive Kamzë dhe Kavajë, sipas detajimit të mëposhtëm:
a) Bashkisë Kamzë i transferohet fondi prej 163 890 000 (njëqind e gjashtëdhjetë e tre milionë e tetëqind e nëntëdhjetë mijë) lekësh, në formën e transfertës së pakushtëzuar, afërisht 1.6 milionë dollarë;
b) Bashkisë Kavajë i transferohet fondi prej 346 350 000 (treqind e dyzet e gjashtë milionë e treqind e pesëdhjetë mijë) lekësh, në formën e transfertës së pakushtëzuar.
Qeveria ngarkon Ministrin e Shtetit për Rindërtimin dhe Ministrinë e Financave për zbatimin e këtij vendimi, i cili tashmë ka hyrë në fuqi.
Lorenc Rabeta / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.