“Ringjallet” sektori i shërbimeve në Eurozonë / Heqja e karantinës dhe vaksinimi i shpejtë, rimëkëmbin bizneset
Aktiviteti i bizneseve në Eurozonë është rritur në Maj, ndërkohë që lehtësimi i masave të karantinës së koronavirusi ka rikthyer pak normalitet tek industria gjigante e shërbimeve, sipas një sondazhi, që vjen paralelisht me rritjen rekord të aktivitetit të fabrikave. Përshpejtimi i programeve të vaksinës në rajon dhe rënia e vdekjeve të raportuara nga virusi, ka bërë që qeveritë të heqin disas masa të vendosura për të frenuar infeksionet. Indeksi PMI i Markit, që formohet nëpërmjet mijëra sondazhesh dhe shihet si një tregues i mirë i shëndetit ekonomik, u rrit në 57.1 pikë në muajin Maj, nga 53 që ishte në Prill, dhe në nivelin më të lartë që prej Shkurtit 2018. Një nën tregues që mbulon industrinë mbizotëruese të shërbimeve në Eurozonë, u rrit në nivelin më të lartë në 3 vite. Analistët thonë se sektori gjigant i shërbimeve është rikthyer në jetë gjatë Majit, duke nisur një rimëkëmbje të fortë që pritet të vazhdojë gjatë Verës. Sipas sondazheve, bizneset kanë raportuar rritjen më të madhe të kërkesës që prej nisjes së 2018-s, ndërkohë që masat e Covid janë lehtësuar dhe progresi i vaksinës ka rritur besimin. Më herët gjatë javës, të dhënat treguan se aktiviteti i manifakturës u rrit me nivelin më të lartë të të gjitha kohërave në Maj. Eurozonë pritet të dalë nga një recesion i dyfishtë këtë tremujor dhe të rritet me 1.5%, sipas sondazheve.
Klevis Llaha – SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.